BRASILIA (AFP).- Presidente di Brasil, Luis Inacio Lula da Silva, a papia na telefòn siman pasá ku e presidente venezolano, Nicolás Maduro, riba “pas den Sur Amérika”, segun presidensia brasilero a informá ayera. Maduro ta enfrentá preshon di Merka, ku ta akus’é di ta na kabes di un organisashon di narkotrafikante i a bombardiá dilanti di kostanan venezolano vários barku ku supuestamente tabata karga droga.
E mandatarionan suramerikano tabatin un kòmbersashon “kòrtiku” den e promé siman di desèmber i a papia riba “pas den Sur Amérika i Karibe”, segun un fuente di presidensia di Brasil. Maduro i Lula no tabatin kontakto ku otro despues di elekshon presidensial di Venezuela den yüli di 2024, di kua e resultado no a keda ofisialmente rekonosé pa Brasil.
E fuente a bisa ku “no tin intenshon” di parti di Lula di “ta mediadó” den e krísis entre Washington i Caracas. Merka ta multipliká e medidanan, tantu ekonómiko komo militar, pa oumentá preshon riba e presidente venezolano. Den un entrevista resien, e presidente merikano, Donald Trump, a bisa ku “e dianan di Maduro ta kontá”.
Maduro ta nenga e akusashonnan di Washington i ta bisa ku Trump ta buska un”kambio di régimen” pa apropiá su mes dje reservanan di petroli venezolano. Lula a bisa djaweps di a defendé dilanti e presidente norteamerikano un polítika pasifista pa e region. “M’a bis’é, Trump nos no ke un guera den Amérika Latina”, segun Lula a bisa den un aktividat ofisial. Segun relato dje brasilero, Trump a kontesta: “Pero ami tin mas arma, mas barku, mas bòm”.
