ADIS ABEBA, Etiopia (AFP).- E presidente brasilero, Luiz Inácio Lula da Silva, a akusá Israel di kometé “genosidio” kontra di sivilnan palestino di Gaza i kompará su akshonnan ku e kampaña di Adolf Hitler pa kaba ku hudiunan. “E loke ta sosodiendo den Gaza no ta un guera, e ta un genosidio”, segun e brasilero a deklará na prensa na Adis Abeba, Etiopia, kaminda e ta tuma parti komo invitado den e kumbre anual di Union Afrikano.
E mandatario iskierdista dje prinsipal potensia latinoamerikano a deklará ku e konflikto “no ta un guera di sòldá kontra di sòldá”. “Loke ta pasando den e parti ei di Gaza ku e pueblo palestino no a sosodé na ningun otro momento den historia. Pero en realidat, el a sosodé: tempu ku Hitler a disidí na mata hudiunan”, el a agregá.
Komo kontesta, e promé minister israelí, Benjamin Netanyahu, a kalifiká e komentarionan di Lula komo: “un bèrgwensa i grave”, bisando ku e ta un forma pa “kita importansia for di holokousto” i a anunsiá ku su gobiernu a konvoká e embahador di Brasil na Israel.
“E komparashon entre Israel i Holokousto di e nazinan i Hitler ta krusa un linia kòrá”, segun e mandatario a bisa den un komunikado, den kua e ta insistí ku Israel ta “bringando pa defendé su mes”.
Segun e minister israelí di Relashonnan Eksterior, Israel Katz, e reunion ku e embahador brasilero lo tuma lugá awe. E deklarashonnan di ayera ta esnan mas fuerte emití te na e momento ei di parti di Lula relashoná ku e konflikto. Lula ademas di ta presidente di Brasil, aktualmente ta okupá e presidensia di G20.
E movementu Hamas a “yama danki” den un komunikado pa e deklarashonnan di Lula, ku ta duna “un deskripshon presis di loke e pueblo ta sufri den Gaza i ta referí na e magnitut dje krímen kometé pa Israel ku apoyo bon kla dje gobièrnu di Biden”.
Lula den luna di novèmber a bisa ku e loke Hamas a hasi tabata “un akto di terorismo” matando 1.160 hende den Israel. Pero na mes momento el a kritiká e “reakshon for di proporshon” di Israel den Gaza, ku a laga 28.985 morto, den su mayoria mucha i menornan.
