RIO DE JANEIRO (AFP).- Presidente di Brasil, Luiz Inacio Lula da Silva, a akusá e hefe di diplomasia di Merka, Marco Rubio, di ta “enemigu mortal” di vários pais latinoamerikano, despues ku Washington a bolbe menasá ku impuesto nobo riba produktonan brasilero. E relashon “un friu, un kayente” entre Merka i Brasil a bolbe bira tenso, ménos ku un luna despues di un reunion di tres ora entre Lula i e mandatario merikano Donald Trump, enkuentro ku ámbos a bisa tabata positivo.
E ofisina di Representante Komersial norteamerikano a akusá Brasil di práktikanan komersial no leal den asuntunan manera retnan sosial, propiedat intelektual i algun otro punto, i a menasá ku imponé un impuesto general di 25%.
Lula a bisa ku e anunsio a tuma lugá “miéntras ku ainda nos tabata den negoshashon”. Trump i Lula a bisa ku tin un akuerdo di un periodo di 30 dia pa sali for di e diferensianan komersial.
E iskierdista ta buska un di kuater mandato den elekshonnan di òktober. Su rival ta e senador Flavion Bolsonaro, yu dje eks presidente derechista Jair Bolsonaro, aliado di Trump.
Siman pasá Flavio Bolsonaro a reuní ku Trump i Rubio na Washington. “E tal Marco Rubio, ku ta enemigu mortal di vários pais latinoamerikano i ku no ta gusta Brasil, no tabata den e reunion ku m’a sostené ku Trump”, segun Lula a bisa, refiriendo na un posibel partisipashon dje hefe di Departamento di Estado den e desishon. Mas aleu Lula a tacha e senador di ta un “traidor” pa motibu di a pidi un pais strañero pa “mete den asuntunan brasilero”.
Esaki ta e di dos sla pa Lula despues dje reunion ku Trump. E promé a yega siman pasá ora ku Merka a designá e dos prinsipal gèngnan kriminal brasilero, Pimeiro Comando da Capital i Comando Vemelho, komo gruponan terorista, apesar di e rechaso di Brasil den esaki.
Aña pasá, Trump a imponé impuestonan fuerte riba Brasil komo reakshon riba loke nan ta konsiderá komo “yagmentu” riba Jair Bolsonao, kondená na 27 aña di prizòn pa intento di gòlpi di estado.
