BRASILIA (AFP).- E presidente brasilero, Luiz Inacio Lula da Silva, a destituí su minister di Derechinan Humano, Silvio Almeida, despues ku esaki a keda señalá di parti di vários hende muhé di akoso seksual, un skandal ku a sakudí su gobièrnu den último oranan.
“Mirando e denunsianan grave kontra di minister Silvio Almeida i despues di a konvok’é pa un kombersashon den Palasio di Planalto, presidente Lula a disidí pa retir’é dje funshon konsiderando e naturalesa dje akusashonnan”, segun un nota di gobièrnu.
E polémika a start na momento ku den notisia a revelá ku e asosashon Me Too Brasil a risibí denunsia di vários hende muhé, inkluso di minister di Igualdat Rasial, Anielle Franco.
Me Too a konfirmá loke a keda publiká i a splika ku e damanan envolví a risibí apoyo sikológiko i hurídiko.
Polis federal ayera a anunsiá di lo investigá e denunsianan, miéntras ku e Komishon di Etika di Presidensia a start un prosedimentu preliminar pa aklará e situashon.
Lula den su promé deklarashonnan riba e tema a bisa ku “un persona ku ta hasi akoso seksual no por keda den gobièrnu”, ounke el a agregá ku ainda e minister no a keda akusá.
Konsiderá un dje prinsipal intelektualnan di Brasil, Almeida a nenga e akusashon den un video, kalifikando komo “gañamentu” i denunsiando un kampaña pa perhudiká su “imágen komo hòmber pretu ku ta okupá un posishon importante den gobièrnu”.
