Presidente brasilero, Luiz Inacio Lula da Silva
BRASILIA (AFP).- E presidente brasilero, Luiz Inacio Lula da Silva, ayera a veta un lei pa baha di forma signifikativo e kantidat di añanan di prizòn di su predesesor Jair Bolsonaro, kende ta kumpli un kondena pa intento di gòlpi di estado. Kongreso, di mayoria konservador, sinembargo, por eliminá e desishon mediante votashon.
Den sèptèmber, despues di un kaso históriko, e eks-presidente a keda kondená na 27 aña di prizòn una bes el a keda deklará kulpabel di konspirashon pa kue poder di forma “outoritario” despues di su derota kontra di Lula den 2022. Bolsonaro, di 70 aña ta kumpli ku un kondena den prizòn di Brasília for di kabamentu di novèmber último i e luna’ki korte supremo a rechasá un petishon pa e sinta su kastigu na kas pa motibunan di salú.
Segun leinan aktual, e mester sinta su kastigu den prizòn pa sigur ocho aña pa por yega na remarke pa fleksibilisashon dje kastigu. Pero kongreso den desèmber a aprobá un lei ku por redusí e periodo ei na poko mas ku dos aña.
E veto na e proyekto ei ta tuma lugá riba un fecha hopi simbóliko: Lula a firm’é durante di un seremonia ofishal pa e di tres aniversario dje disturbionan di 8 di yanüari di 2023 na Brasília. E dia ei, míles di partidario di Bolsonaro a kibra drenta i a kometé destrukshon den edifisionan di gobièrnu, un siman despues dje instalashon di Lula pa su di tres mandato. Nan tabata eksigí un ”intervenshon militar” pa deroká e presidente iskierdista, kontra kende nan lider a pèrdè e reelekshon den òktober di 2022
