CARACAS (AFP).- E lider di oposishon venezolano i premio Nobel di Pas, Maria Corina Machado, a bisa ku Venezuela “mester di muchu mas ku plaka”, despues dje akuerdo petrolero alkansá entre Merka i e gobièrnu interino di Delcy Rodriguez, di kua e tin duda riba e legitimidat.
Den un video grabá den eksilio, i publiká riba X, Machado a bisa ku “e sektor petrolero ta djis un parti dje rekonstrukshon inmenso” di Venezuela, ku “ta referí invershonnan enorme”.
“Den un pais ku e dimenshonnan i un institushon frágil, ningun sektor por funshoná di manera aislá”, segun Machado, kende a sali for di Venezuela na un manera klandestino den desèmber pa por a risibí e Premio Nobel di Pas i ta biba aktualmente na Panamá.
E presidente di Merka, Donald Trump, siman pasá a anunsiá e firmamentu di un”akuerdo históriko” ku Venezuela ku ta duna su pais e 20% di e gigante reservanan petrolero venezolano.
E konvenio ta duna Merka e kòntròl di 65.000 mion di barí di krudo den 17 kampo den e diferente zonanan dje pais.
Venezuela ta konsiderá di lo optené benefisionan pa 209.000 mion dollar den 25 aña.
“Tur esei ta duna Venezuela un balor stratégiko ekstraordinario, tantu pa seguridat nashonal di Merka komo pa e stabilidat di e hemisferio. “Pero e patrimonio di nos suela no ta pertenesé na un régimen ilegal, e ta pertenesé na e pueblo venezolano”, segun Machado a bisa.
