BUENOS AIRES, AP.- Djárason e presidente argentino Mauricio Macri a manifestá su deseo pa e demókrata Hillary Clinton wòrdu skoh’é komo presidente di Merka i a reafirmá su apoyo na e referèndem pa kita presidente venezolano Maduro di su posishon.
“Hillary”, asina Macri a bisa despues di a wòrdu konsultá riba kua di e dos kandidatonan pa presidensia merikano e ta preferá den un entrevista bibu ku e wèpsait merikano Buzzfeed.
E preguntanan, a wòrdu basá riba sugerensia risibí di usuarionan di retnan sosial.
“Ami ta kere den relashon, no den muraya. Nos ta spera riba esei desde akinan, pues mi ta spera di por tin un kontra parte ku ta kere den meskos i e proposishonnan ku Trump a hasi ta kontrali na loke mi ta kere aden”. Asina Macri a indiká, kende ta un konservador teknokrata na poder desde ocho luna kaba.
Macri a agregá ku lo no ta fásil pa konstruí un relashon den kaso ku e republikano triunfá. “Pero suponiendo ku e momentu ei yega, mi ta bai purba hasi e vínkulo ei ku nos a kuminsá konstruí entre siudadanonan argentino i merikano, mas estrecho, ku benefisio mutuo, inteligente, madurá, habrí, i kontinuá ku esun ku mi mester forma un relashon kuné”.
