BUENOS AIRES, AP.- E presidente argentino Mauricio Macri a presentá un plan di lucha kontra narkotráfiko ku ta kontemplá eradikashon di tráfiko di droga elaborá ku residuo di kokaina, konfiská di vienes di narkotrafikantenan i aplikashon di teknologia pa lucha kontra e organisashonnan kriminal aki. “Algu ku ta preokupá nos ta e avanse di narkotráfiko den nos pais. Esaki a avansá hopi kontra e ignoransia di e problema di parti Estado, pero no a pone e tema riba mesa pa komprondé kiko tabata pasando i kon pa resolvé esaki”, asina e mandatario a afirmá, kende a asumí poder den desèmber.
Macri a atvertí ku narkotráfiko no ta un problema di un sierto zona so, esaki a “ekstendé den e pais kompletu”.
Entre e asistentenan di e akto, tabatin presidente di Korte Supremo, Ricardo Lorenzetti; fiskalnan, gobernadornan di diferente provinsia i legisladornan ofisialista i di oposishon.
E subida di akshon di ‘gang’-nan narkotrafikante a kombertí den motibu di preokupashon pa outoridatnan i hustisia i Iglesia Katóliko argentino. E dos último institushonnan aki a publiká dokumentonan kaminda a atvertí ku tráfiko di droga a pasa pa zonanan marginal di vários siudat afektando e hóbennan i subiendo delinkuensia.
