EMMANUEL MACRON; Presidente di Fransia.
BRUSSEL (AFP).- E presidente franses, Emmanuel Macron, a hasi un yamada na e Presidente di Komishon Europeo, Ursula von der Leyen, pa bin ku un lei europeo ku ta prohibí pa menornan di 15 aña tin akseso na retnan sosial. Esaki ta ku e meta pa “protehá muchanan” di paisnan ku ta forma parti dje bloke.
E mandatario franses ke bini ku protekshon di menornan riba retnan sosial i regla e kantidat di tempu dilanti di pantayanan komo un dje puntonan di su di dos mandato, ku ta finalisá den mei di 2027.
“Ta indispensabel pa bai mas leu i bini ku un teksto europeo nobo di prohibishon di akseso na wèpsaitnan di retnan sosial pa menornan di 15 aña”, segun Macron a skirbi den un karta fechá 29 di ougùstùs.
“E urgensia ta einan”, segun e presidente franses, kende a logra den último lunanan pa reuní un koalishon di paisnan di Union Europeo faborabel pa establesé un “mayoria digital”, aunke tin diferensia entre nan i esaki spesialmente riba e edat mínimo ku mester fiha.
“E verifikashon di edat mester ta basá riba mekanismonan nashonal i europeo sólido i ku rèspèt pa privasidat”, segun Macron.
Van der Leyen a primintí den luna di yüli último pa presentá proposishonnan riba e tema i lo e hasi esaki despues di zomer.
