PARIS, Fransia (AFP).- E presidente franses Emanuel Macron, a nombra komo promé minister su aliado sentrista i veterano polítiko François Bayrou, di 73 aña, ku e reto pa trese huntu un mayoria parlamentario ku lo impedí su kaida, loke sigur lo hasi mas serio e krísis polítiko dje pais.
“E nòmber di François Bayrou e último dianan a zona komo esun mas aseptabel”, segun hendenan rondó di Macron, ku a enkarg’é pa dialogá ku sobrá partido, ku eksepshon di ekstrema derecha òf iskierda radikal, pa logra un “stabilidat”.
Bayrou, alkalde di Pal, den zùitwèst di Fransia i kende ta pertenesé na e formashon Mo Dem, a bira e di kuater promé minister di Macron den 2024 i lo remplasá e konservador Michel Barier (73), kende a kai dia 4 di desèmber den un moshon di sensura ora ku e tabata purba na aprobá e presupuesto pa 2025.
Pero lo no ta un tarea fásil. “Ningun hende konosé e situashon difísil aki mihó ku mi” ora ku ta trata di polítika i presupuesto di Fransia, segun Bayrou a bisa durante e traspaso di podernan.
E hefe nobo di gobièrnu a bisa di ta konsiente dje “Himalaya ku ta nos dilanti” i a hasi un yamada riba ”rekonsiliashon” pa sali for dje instabilidat polítiko.
Macron den luna di yüni a hinka Fransia den un krísis polítiko ku un adelanto no sperá di elekshon parlamentario di 2027, ku a laga Asamblea Nashonal sin mayoria bon kla i dividí den tres blòki: iskierda, sentroderecha i ultraderecha.
