CARACAS, AP.- Nicolás Maduro a huramentá dilanti Tribunal Supremo di Hustisia na Venezuela i a kuminsá su segundo mandato meimei di un preshon internashonal kresiente.
E gobernante di 56 aña a huramentá den un di e salanan di tribunal máksimo miéntras Organisashon di Estadonan di Amérika (OEA) a aprobá un resolushon ku no ta rekonosé legitimidat di e segundo presidensia di Maduro,
E seremonia den Tribunal Supremo ta un desafio pa Asamblea Nashonal, di mayoria opositor, kual ta bisa ku e reelekshon di Maduro ta ilegal.
E presidente di tribunal máksimo, Maikel Moreno, a indiká ku Kongreso “no ta wòrdu rekonosé” i komo konsekuensia “tur esaki su aktonan ta nulo”. Esaki tabata su splikashon tokante e motibu dikon a skohe Tribunal Supremo pa huramentá Maduro i no Asamblea Nashonal, manera konstitushon ta establesé.
“Mi a kumpli ku konstitushon, mi huramentu ta sertifiká i desde awe mi ta asumí mi puesto komo presidente di e repúblika pa un segundo periodo di 2019-2025”. Asina Maduro a afirmá gradisiendo asistensia di representantenan di 93 pais na e akto.
E diplomátikonan di mayoria pais den serkania di Venezuela i Union Europeo, ku no ta rekonosé reelekshon di maduro, tabata ousente.
