WILLEMSTAD.- Maduro & Curiel’s Bank (MCB) resientemente a selebrá su di tres edishon di MCB Volunteer Award, bou di e tema “Guardians of Light”. Un anochi kaminda MCB a rekonosé e impakto ekstraordinario ku empleadonan di Banko ta hasi den nos komunidat.
Durante e evento aki, boluntarionan di MCB tabata sentro di atenshon. Koleganan ku banda di nan responsabilidatnan diario, ta hasi un diferensia den bida di otro, a keda honrá pa nan kompromiso, pashon i kontribushon den diferente inisiativa sosial.
Den un ambiente di apresio i orguyo empleadonan a haña rekonosementu individual i/òf komo departamentu. Un total di 28 kolega a keda nominá i 11 ganadó individual premiá. Ademas di esei a rekonosé kuater departamentu. Tur ganadó a risibí un obra di arte úniko di e artista lokal Giovanni Abath ku ta propietario di 7.1 Experience Art Gallery. E obra di arte ta simbolisá nan ròl komo “Guardiannan di Lus” i nan kontribushon sobresaliente den diferente area di boluntariado, manera CuraDoet, inklushon, religion, servisio den bario, medio ambiente, deporte, asistensia na grandinan i edukashon.
Un momentu sobresaliente di e anochi tabata e presentashon di e premio “Overall Volunteer” kaminda a honra un kolega ku a demostrá un kompromiso eksepshonal i a logra un impakto amplio den diferente kategoria/proyekto.
MCB Volunteer Award 2026 a pone lus riba e trabou importante ku ta keda hasí i a reafirmá e balor di boluntariado. Ku inisiativanan manera esaki Maduro & Curiel’s Bank ta demostrá na su empleadonan ku nan akshonnan ta iluminá i fortalesé nos komunidat.
