a tuma vários medida pa un eventual invashon norteamerikano.
CARACAS (AFP).- E presidente di Venezuela, Nicolas Maduro, ayera a duna di konosé ku Merka ta preparando un “agreshon” di “karakter militar” kontra di su pais, i a sigurá ku su gobièrnu lo enfrentá esaki teniendo kuenta ku “leinan internashonal”. Den e último simannan Merka a manda ocho barku den laman zùit di Karibe den un operativo kontra di droga.
Washington ta akusá Maduro di supuesto konekshon ku narkotráfiko i ta pidi un rekompensa di 50 mion dòler pa kaptura dje mandatario. “Tin un agreshon na kaminda, di karakter militar, i Venezuela ta asistí pa leinan internashonal pa enfrentá esaki”, segun e mandatario venezolano a indiká ayera den un konferensia di prensa ku media internashonal. Maduro a anunsiá, ademas, ku “e komunikashon ku gobièrnu di Merka ta kibrá”, i a referí na e sekretario di estado di Merka, Marco Rubio, di ta un “hòmber di morto i guera”.
Rubio siman pasá a referí na Maduro komo un “fugitivo di hustisia norteamerikano” i ku pa e motibu ei tin e rekompensa solisitá di parti di Merka pa su kaptura. Venezuela ta rechasá e akusashonnan ei i siman pasá Maduro a ordená pa pone 25.000 efektivo di Forsa Armá na e estadonan di frontera ku Colombia i Karibe. Tambe Maduro a hasi un yamada na e organisashon sivil Milicia Bolivariana pa prepará pa un eventual invashon norteamerikano.
Den wikènt último, gobièrnu venezolano a denunsiá ku militarnan norteamerikano ku ta forma parti di tripulashon dje barku di guera, USS Jason Dunham, durante di ocho ora a detené un barku di piskadónan ku tabata nabegá den laman venezolano.
