CARACAS (AFP).- Presidente di Venezuela, Nicolás Maduro, ayera a yega Rusia pa reuní ku su par ruso, Vladimir Putin, den kuadro di selebrashonnan dje 18 aniversario di Dia di Viktoria di Segunda Guera Mundial.
Rusia lo risibí dirigentenan di komo trinta pais pa e fiesta di triunfo ruso riba Alemania nazi.
E mandatario venezolano a yega Mòsku den oranan di mardugá na bordo di un Airbus A340 dje aerolínea estatal Conviasa. El a yega huntu ku e promé dama, Cilia Flores, segun imágennan di televishon.
Despues di un video-conference dia 14 di mart último, Putin a invitá Maduro pa bishitá Mòsku pa firma un akuerdo destiná pa “amplia” e koperashon bilateral.
Putin awe lo reuní na Mòsku ku Maduro, tambe ku presidente di Cuba Miguel Diaz Canel, dos aliado tradishonal di Rusia den Amérika Latina.
“Venezuela ta un sosio importante di Rusia. E lasonan bilateral ta sigui desaroyá den tur sentido”, segun e konsehero diplomátiko di Putin, Yuri Ushakov. E mandatarionan tin intenshon pa firma un “tratado di asosiashon stratégiko”.
E selebrashonnan lo kaba 9 di mei ku un gran desfile militar riba Plasa Korá di Mòsku.
E relashonnan entre Mòsku i Caracas a bira fuerte durante e presidensia di defuntu Hugo Chaves (1999-2013) i a sigui amplia ku Maduro. Rusia ta apoyá Maduro relashoná ku kuestionamentu di su reelekshon dia 28 di yüli di 2024, rechasá pa Washington entre denunsia di froude di oposishon, ku ta reklamá viktoria di e eksiliado Edmundo Gonzalez Urrutia.
Venezuela, di su parti, ta respaldá Rusia den e guera den Ukrania.
