CARACAS (AFP).- Presidente di Venezuela, Nicolás Maduro, ayera a kalifiká komo akto di “pirateria naval kriminal” e konfiskashon di parti di Merka di un barku kargando krudo venezolano i a denunsiá e “sekuestro” di e tripulashon. Washington for di luna di ougùstùs a manda den Karibe vários barku di guera i avionnan di kombate komo parti di loke nan a bisa ta un operashon anti droga, pero ku Caracas ta konsiderá ku ta un forma pa buska pa tumba gobièrnu di Maduro.
E konfiskashon dje barku di guera ta algu nobo den e krísis. E presidente di Merka, Donald Trump, ayera a informá ku su forsanan militar a para “un gran petrolero” i a adelantá ku nan por konfiská e krudo. Algun ora despues Venezuela a denunsiá e suseso: “Nan a sekuestrá e tripulashon, a hòrta e barku i a start un era nobo, e era di pirateria naval kriminal den Karibe”, segun Maduro a bisa ayera den un akto presidensial na Caracas.
Segun Maduro, e barku tabata transportá 1.9 mion bari di krudo venezolano. Registronan promé dje wèpsait di barkunan MarineTraffic a referí na 1.1 mion.
“Awor nan maskarada a kai. “E supremasistanan ku ta gobernando na Merka ke un guera den Suramérika”, el a sigui bisa. E mandatario iskierdista a indiká ku nan a duna instrukshon pa tuma “akshonnan legal, diplomátiko” na tur instansia. “Venezuela ta bai sigurá ku tur e barkunan tin garantia di komersio liber”, el a bisa mas aleu.
E prinsipal entrada di Venezuela ta krudo, ku ta someté na un embargo for di 2019. Esaki ta obligá e pais pa pone su produkshon riba merkado pretu na preisnan konsiderablemente mas abou, destiná partikularmente pa paisnan asiátiko.
