CUCUTA, COLOMBIA, AP.- Nicolás Maduro a denunsiá ku su atversarionan venezolano, kende ta haña sosten di Merka, ta e kousanan di e krísis humanitario.
“E show yama ‘operashon humanitario ta un atentado kontra e soberania nashonal, di parti e gobièrnu di Donald Trump, kende a ratifiká su menasa pa un invashon militar kontra Venezuela, segun indikashon di e mandatario den un rueda di prensa den palasio di gobièrnu.
E deklarashon a tuma lugá un dia despues ku trùknan ku yudansa humanitario a yega na e siudat na frontera kolombiano di Cucuta.
“E yudansa humanitario ta un show pa hustifiká un intervenshon den e pais agregando ku “esaki ta pasa miéntras nan ta blòkia nos tin kasi 10.000 mion dòler na mundu”.
Oposishon venezolano a primintí di entregá e yudansa humanitario pero ainda e no sa kon pa logra laga esaki drenta Venezuela, kual su frontera e wòrdu blòkia pa militarnan.
E embahador di Merka na Colombia, Kevin Whitaker, a bisa ku kontrali na loke e gobièrnu venezolano ta afirmá, e yudansa “ta un esfuerso pa yuda 20 aña di mal maneho, korupshon, kriminalidat i inefisiensia. Tin un gran interes di e komunidat internashonal pa yuda e pais venezolano.
El a agregá ku “ta trata di un kampaña humanitario ku base moral i étiko pa aliviá doló i hamber. E yudansa a wòrdu outorisá pa presidente interino Juan Guaidó i ta trata di un kaso urgente”.
E intenshon ta pa laga e yudansa drenta Venezuela di forma pasífiko.
Guaidó, hefe di Asamblea Nashonal venezolano di mayoria opositor, a promové e inisiativa pa haña yudansa internashonal.
