Presidente venezolano Nicolás Maduro, na momento di depositá su voto.
CARACAS (AFP).- E chavismo gobernante den Venezuela tabata riba kaminda pa un viktoria aplastante den elekshon ayera, marká pa un ola di aresto di dirigentenan di oposishon i yamadanan pa e komunidat no partisipá den e proseso.
Dies luna despues dje re-elekshon kuestioná di e presidente Nicolás Maduro i e disturbionan ku a sigui, ayera a eligí e 285 diputadonan pa asamblea Nashonal i 24 gobernador.
E lider opositor, Maria Corina Machado, a hasi un yamada na su partidarionan pa no vota miéntras ku ketu bai tin denunsia di froude den e elekshon presidensial di 28 di yüli 2024.
Periodistanan di AFP a tuma nota di urnanan elektoral ku masha tiki hende.
“Mi no ta bai vota pasobra nos mester sali for dje régimen aki”, segun Mirian Cristina Perez, edukadó penshoná di 73 aña na San Cristóbal. “E kos akí ta pa mustra ku nos ta den demokrasia siendo ku tur hende sa ku esei no ta e kaso. “E votashon a kana masha lihé, pasobra realmente no tabatin hende”, segun Yaskon Urbina kende ta un empleado públiko.
Pero di tur manera, sin importá e kantidat di votadónan, e apstenshon a garantisá ku chavismo ta imponé den mayoria dje funshonnan pa duna aún mas poder na Maduro.
Un enkuesta a duna komo resultado ku e dia di elekshon lo sera ku un partisipashon di 16% dje 21 mion siudadanonan yamá pa vota.
E elekshon a tuma lugá algun dia despues di un ola di aresto di sigur 70 dirigente opositor akusá di ta forma parti di un “grupo terorista” pa stroba e e elekshon. Entre esnan detené a figurá e dirigente Juan Pablo Guanipa, persona hopi yegá na Machado.
“Nos a logra tene elekshon sin un insidente i nos a logra derotá e violensia”, segun Maduro a duna di konosé.
