CARACAS, VENEZUELA, AFP.- E presidente di Venezuela, Nicolás Maduro, a deskribí e kondishonnan ku Merka ta imponé pa duna lisensianan pa negoshá krudo di Venezuela, ku ta prohibí pago di plaka na empresanan estatal di e pais karibense komo un “sistema kolonial”.
Merka a imponé un serie di sanshon riba Venezuela, pa preshoná kaida di e mandatario chavista, inkluyendo e prohibishon pa komersialisá petroli di e nashon karibense desde 2019. Sinembargo, meimei di e krísis di energia provoká pa e guera na Ukrania, Kas Blanku a purba drecha su relashon ku Maduro i fleksibilisá e embargo aki.
E empresa merikano Chevron a haña un lisensia di Ofisina di Kontrol di Aktivonan Estranhero (OFAC) pa kontinuá ku e operashonnan na Venezuela, pero solamente si e plaka generá wòrdu usá pa paga e debe ku PDVSA tin ku e empresa. Den mart, e empresanan europeo manera Eni i Repsol tambe a haña lus bèrdè pa operá den e pais karibense ku e mesun kondishonnan.
Maduro a denunsia e sistema kolonial aki di OFAC, durante selebrashon di huramentashon di Hugo Chavez 24 aña pasá.
