NEW YORK (AFP).- Esun ku un tempu tabata un poderoso magnate di sine, Harvey Weinstein, kende su kaida den 2017 a kondusí na nasementu dje movementu mundial #MeToo, ayera a regresá den banki di hustisia pa keda husgá pa violashon i agreshon seksual. Esaki despues ku a anulá su promé kondena.
E kondena di un hurado popular den 2020 na 23 aña di prizòn a keda anulá pa e Tribunal di Apelashon di New York den aprel di 2024 pa motibu di diferente fayo.
Weinstein (73) ayera a asistí na e promé dia di selekshon di miembronan di hurado, den un proseso difísil ya ku vários dje desena di kandidatonan a nenga na forma parti dje hurado, rekonosiendo ku nan no por ta imparsial den e kaso.
E fundadó di e kompania Miramax, huntu ku su ruman Bob, lo keda husgá di nobo pa agreshon seksual di su eks-asistente di produkshon Mimi Haley, den 2006, tambe di a violá e aktris Jessica Man, den 2013, i otro akusashon di supuesto agreshon seksual den 2006 den un hotèl di Manhattan.
Detené aktualmente den un prizòn di Rikers Islands na New York, Weinstein ta kumpli aktualmente ku otro kondena di 16 aña imponé pa un tribunal di Los Angeles pa violashon i agreshon seksual den 2013 di un aktris europeo.
Esun ku un tempu tabata un todopoderoso produktor di éksitonan di sine, manera “Sex, Lies and Videotape”, tambe “Pulp Fiction” i “Shakespeare in Love” a aparesé den último oudiensianan visiblemente debilitá, kabes limpi, bleki i den ròlstul, ounke semper ku un mirada desafiante.
Mas di 80 muhé a akus’é di agreshon seksual òf violashon, entre nan Angelina Jolie, Gwyneth Paltrow i Ashley Judd.
