KUALA LUMPUR, MALASIA, AP.- Mas di 300 norkoreano ta na Malasia i ta prohibí pa sali di e pais, debí na e disputa diplomátiko ku Norkorea pa morto di e ruman di e lider norkoreano Kim Jong Un. Asina vise promé minister di Malasia a indiká.
E total di 315 ta ménos ku e kalkulo anterior ku un funshonario di gobièrnu a duna. El a bisa na The Associated Press ku e ta kere ku 1.000 norkoreano ta den Malasia.
Malasia ta bisa ku Kim Jong Nam a muri despues ku dos muhé a basha neurotoksiko VX den su kara na aeropuerto di Kuala Lumpur riba 13 di febrüari, pero Norkorea ta rechasá e revelashonnan aki.
E relashon entre ámbos pais ta deteriorando. Kada pais a saka embahador for di esaki. Djamars, Norkorea a blòkia salida di tur malayo for di e pais te ora nan yega na un “akuerdo hustu” riba e kaso. Malasia a hasi meskos ku e norkoreanonan.
Ambos pais a anulá biahe sin visa di siudadanonan di e pais pertenesiente.
E vise promé minister Ahmad Zahid Hamidi a bisa na medionan lokal ku 2.453 norkoreano a biaha pa Malasia di 2014 pa 2017, pero ku e último rèkert tabata mustra ku solamente 315 a keda.
