BLANTYRE, MALAWI, AFP.- Presidente di Malawi Lazarus Chakwera a deklará dos siman nashonal di luto djárason pa mas ku 200 persona ku a fayesé dor di Siklon Freddy, kual a kuminsá asotá e pais na komienso di e siman aki.
E siklon a bira suak despues di un biahe di 8.000 kilometer kaminda el a krusa Oséano, kambia di rumbo i gòlpia Afrika pa di dos biaha i establesé un record no ofisial pa e tormenta tropikal di mas largu na mundu.
Siklon Freddy a kousa hopi morto i destrukshon. Na Malawi, e siklon a kousa por lo ménos 225 morto, sentenáres di herido i 41 persona pèrdí, segun sifranan ofisial. E siklon a kousa inundashonnan i desplasamentu di tera i a dera vários habitante.
Chakwera a bisa ku un reunion di gabinete di emergensia a outorisá un suma di 1,5 mion dòler pa yuda míles di malawi afektá pa e tormenta. El a añadí ku e plaka no ta sufisiente.
“E nivel di destrukshon ku nos ta enfrentando ta muchu mas ku e rekursonan ku tin na nos disposishon”.
