Malechornan no a logra bai ku sèn for di ATM di Banco di Caribe

Pa seguridat ta konsiderando pa sera algun ATM

 

WILLEMSTAD.- Ladronnan ku a rementá e mashin di plaka di Banco di Caribe na altura di Arco Iris por a logra habri e espasio i bai paden, pero no a logra bai ku sèn. Manera ta konosí malechornan a logra bula dos mashin di plaka na práktikamente mesun momentu. Esei a tuma lugá awe mardugá kasi 5’or. Den kombersashon ku Fons Simon CEO di Banco di Caribe el a konfirmá pa EXTRA ku a logra rementá e mashin, pero no a logra bai ku sèn. Den mesun rosea el a indiká ku Banco di Caribe a kuminsá pensa pa sera algun ATM na prome lugá mirando e aspekto di seguridat.

Banco di Caribe mirando e desaroyonan di último añanan a tuma medidanan di prekoushon ku ta dunando fruta. Esei mes a pone ku e ladronnan no a logra bai ku sèn for di e ATM na Arco Iris. Pero e situashon ta birando dia pa dia mas serio i esei mes ta motibu ku gerensia di Banco di Caribe a kuminsá kontemplá e idea pa sera algun mashin di plaka. Echo ta ku rònt Korsou tin bastante mashin di plaka hustamente pa fasilitá e kliente, sinembargo e aspekto di seguridat ta birando mas esensial.

Mester tene kuenta ku kada ku rementá un mashin di plaka ku e meta pa saka sèn, ta hasi uso di gas i te ainda e eksploshon a keda na daño material pa e edifisio pero esaki por bai mas leu kaminda ta kousa víktima inosente. Banda di esei tin e otro situashon ku doñonan di propiedat kaminda e banko ta hür pa pone un ATM tambe ta kuminsá ninga pa pone un ATM den nan edifisio pa medio pa e daño grandi ku un eksploshon lo por kousa.

E direktor a sigui bisa ku Banco di Caribe a kuminsá plantia e asuntu aki kaba den seno di asosiashon di bankeronan di Korsou. Na Ulanda tambe por mira kon bankonan ta kuminsá sera algun ATM debí na e aspekto di seguridat di hendenan ku ta biba den bisindario.

SHARE

LEAVE A REPLY