Polis ta konfirmá dos víktima den tráfiko i duna nan identidat

Update 2:

Djabièrnè 16 di ougùstùs 2019, alrededor di 06.30’or, Sentral di Polis a risibí informashon di un aksidente di tráfiko ku a tuma lugá na Helmin Magno Wiels Boulevard na altura di De Savaan.
Na yegada di e unidat, nan a bin topa un mama i yu ku tabata gravemente leshoná.
For di investigashon preliminar ku polis a realisá na e sitio, a sali na kla, ku e mama ku na e momento ei tabatin e yu den su brasa a bai krusa kaya, nèt na momentu ku un vehíkulo tabata aserkando, biniendo for di Julianadorp bayendo den direkshon di Otrobanda.
I e vehikulo aki lo mester a alkansa ámbos persona
Alrededor di 07.30’or dòkter di polis a konstatá morto di e mama i e yu ku a bin fayesé na e sitio di aksidente.
Ta trata di: Julianne Maria Joe, nasé dia 15 di novèmber 1999 i Giun-drick Joe, nasé dia 10 di febrüari 2018, ámbos nasé Kòrsou.
Riba òrdu di fiskal di Ministerio Públiko a konfiská e kurpanan sin bida pa mas investigashon.
Siguiendo ku e investigashon polis a detené e shofùr, J.O.C., di 39 aña, i a konfiská e vehíkulo pa mas investigashon.
Personal di tráfiko ta kontinuá ku e investigashon.

 

Update:

E último informashon ku EXTRA a risibí ta indiká ku e dos personanan ku a pèrdè nan bida den aksidente di tráfiko awe mainta, esta e mama i yu ta hopi yòn. E mama tin 19 aña i na novèmber awor lo a kumpli 20 aña i e yu, un mucha hòmber tin apénas 1 aña.

WILLEMSTAD.-E djabièrnè aki 16 di ougùstùs a habri hopi trágiko na momentu ku den un aksidente di tráfiko un mama i su yu a pèrdè nan bida na momentu ku un shofùr den outo KIA Picanto kòrá a dal mama i yu mata. E aksidente a tuma lugá na e krusada Helmin Wiels bulevar i Moonchiweg. Na e sitio EXTRA a papia ku bosero polisial sr. Imro Zwerwer kende a splika ku e kaso ta den investigashon. Loke por a tuma nota ta ku un vehíkulo tabata bini for di e rotònde na Julianadorp bayendo direkshon di Aqualectra i na e momentu ei un mama tabata krusa kaya ku un yu menor di edat i mas o ménos 1 pa 2 aña. E vehíkulo a alkansá ámbos persona. Tur kos ta mustra ku e vehíkulo tabata kore ku velosidat hopi haltu, pero ta investigashon mester kaba di determiná esei. Polis tin informashon ku e shofùr lo ta konosí ku ta kore outo di forma iresponsabel. A detené e shofùr tambe mesora pa sigui hasi mas investigashon. Segun testigunan, ta for di riba kaminda di Banda Bou a nota ku e shofùr tabata kore bastante iresponsabel. A pidi Slachtofferhulp pa duna guia na dos mucha menor di edat ku tabata den e outo ku a kousa e aksidente i ku mester a mira tur e kaso tristu aki. Riba òrdu di fiskal a konfiská ámbos kurpa sin bida pa outopsia. Forsa na famia di e defuntunan i pas na nan alma.

 

SHARE

LEAVE A REPLY