GAZA (AFP).- Rania Abu Anza ta skonde su kara tras di lágrima, batí pa a pèrdè su beibinan ohochi kende a muri den bombardeo di Gaza. E señora palestino a konta kon el a pasa den vários tratamentu di fertilidat pa por a bira mama, un anhelo largu ku a terminá ku e ofensiva israelí den Gaza kontra e movementu islamita Hamas.

“Awor ken lo yama mi mama?”, ta su pregunta miéntras ku e tabata brasa su yunan sin bida. Kara di un di nan tabata kubrí ku sanger.

Segun e Ministerio di Salú di Gaza, Wisam i Naim, ku ainda no tabatin seis luna, ta figurá entre e 14 personanan ku a muri djasabra anochi durante un bombardeo di Israel riba Rafah, den zùit  di Gaza.

Tur esnan ku a muri ta forma parti di e famia Abu Anza. Nan ta suma na e alrededor di 30.400 mortonan, den su mayoria hende muhé i mucha, ku segun Ministerio di Salú di Gaza a pèrdè nan bida for di despues ku Israel a start su operashon militar kontra di Hamas.

Miéntras ku Rania Abu Anza tabata warda pa dera su yunan, su tras entre loke a sobra di nan kas un kantidat di hòmber tabata grita nòmber di otro famianan sperando ku nan ta na bida.

Israel a duna di konosé ku e kampaña ta pa eliminá miembronan di Hamas, pero Shehda Abu Anza a splika ku e kas tabata di su tio, i ta sigur ku tabatin solamente sivilnan den e kas.

“Tabata 11’or di anochi ora ku nos tabata na soño… tur tabata mucha. Honestamente, no tabatin presensia di ningun militar den e kas”, segun e señora a duna di konosé.

LAGA UN KOMENTARIO

Please enter your comment!
Please enter your name here