Último biaha ku a wak Marcado Palmer tabata na Toko den Kadushistraat
WILLEMSTAD. – Mama di Marcado Palmer no por sosegá te ora ku e haña su yu. Esei ta loke ku e mama, klaramente un señora kibrá ku tin dos aña i nuebe luna buskando su yu, a bisa. E mama ta sigui kere ku e yu ta na bida.
Den deklarashon pa Extra, e mama a bisa ku e último kontakto ku e tabatin ku e yu, tabata 11 di novèmber 2022 via di telefòn. E yu tabata yora i a bisa su mama ku e momentu ei tabata na Jamaica, pa resa pa su persona i ku e ta spera ku pronto e por wak su mama. Despues di aki nunka mas e mama a haña kontakto ku e yu.
A start un búskeda ku polis i famianan pa lokalisá e hóben Marcado Palmer di 21 aña di edat, pero tur e esfuersonan hasí te awor akí no tin pista di paradero di Palmer.
P’esei meskos ku dos aña i mei pasá, e mama ta bolbe pidi kooperashon di komunidat pa por lokalisá o por bisa sikiera algu di e hóben pèrdí. Polis a hasi tur kos e tempu ei ku ta den nan alkanse, pero no a haña niun informashon tokante Palmer.
E mama ta kibrá pero te na e momentunan akí no ke pèrdè speransa ku un dia e lo lokalisá su yu.
Manera menshoná for di dia 11 di novèmber 2022 a mira Palmer pa último biaha na Toko den Kadushistraat, Montaña. Despues di einan no sa nada mas di Palmer.
E hóben a bin Kòrsou ku fakansi, esei segun deklarashon di e mama. Kiko a bai robes, e mama no sa o sea no por komprendé kiko a bai robes ku te e dia di awe, e no sa unda su yu ta.
Ta trata di un mucha ku tabata studiando normal, un futuro briante su dilanti i un bon mucha. Pues, esei ta motibu ku e mama tin speransa pa di un manera òf otro e por haña
su yu.
Señalamentu di Marcado Palmer, ta koló di kueru brùin kla, e ta midi 1 meter 70 i tin kabei chikí. Komo karakterístika e tin un marka di kimá na su lep ariba.
E mama ta pidi esnan ku por sa algu di Palmer pa drenta den kontakto ku su persona na numbernan di telefòn, 678-7845/690-7547 òf via di WhatsApp, +1876-372-0428.
