WILLEMSTAD.- Partidonan MAN i PIN ta bai dal un siguiente paso den unifiká e dos partidonan den 1 solo partido, MAN, manera a anunsiá for di 2023 na momento ku a drenta den un laso di kooperashon estrecho ku otro i disidí ku lo partisipá na elekshon 2025 ku un lista kombiná, esta MAN-PIN. Den direktiva di ámbos partido a bai di akuerdo ku un konsepto di un plan pa finalisá e integrashon total di e dos partidonan den un solo partido.
E siman akí e direktivanan di e 2 partidonan ta presentá e plan den konsepto aki na nan respektivo konsehonan di partido pa ratifiká esaki. Dia 30 di mei awor MAN ta tene su kongreso statutario pa asina sementá e siguiente paso di e fushon entre e 2 partidonan. E siguiente pasonan ku ta bai dal ta spesífikamente di índole práktiko.
Un di e promé pasonan ta ku miembronan di partido PIN ta pasa pa bira miembro di partido MAN. Ku esaki nan ta haña derecho di voto tambe den e kongreso statutario di 30 di mei awor si nan ta deseá. Den e kongreso lo skohe un direktiva nobo pa e próksimo 2 añanan i tantu MAN komo PIN ta skohe un presidio ku ta konsistí di kandidatonan pa drenta den e direktiva nobo di MAN.
Ta un proseso pues ku tin kasi 3 aña andando. Pa medio di enkuentronan sosial regular, miembronan di MAN i PIN a topa ku otro pa papia i diskutí riba tur tipo di tópiko. Den e frakshon di MAN-PIN den Parlamento tambe por nota un union total kaminda e parlamentarionan semper ta bin dilanti komo parlamentarionan pa MAN-PIN i no ta referí nunka na sea partido MAN so òf partido PIN so.
Ku e integrashon akí lo atendé ku puntonan polítiko i di partido den un solo reunion di konseho di partido, esta esun di MAN. Despues di e integrashon práktiko aki lo sigui traha riba e aspektonan hurídiko formal. Un konsepto di statutonan adaptá ta bai pa notario pa kontrolá.
MAN lo keda un partido a base di e filosofia sosial demókrata. Ku e kambio di statutonan lo añadí sinembargo e filosofia humanista kristian i inovativo di PIN na esaki. Algu ku MAN-PIN ta práktika kaba den e tipo di polítika ku ta hiba mirando inisiativanan di lei ku e frakshon a entregá na Parlamento manera lei di penshun general, lei pa kambia suèldu mínimo hubenil, i lei pa introdusí verlòf pa tata despues ku nan yu kaba di nase.
Ku e fushon entre e dos partidonan ta spera di ta krea un base polítiko mas fuerte. Alabes ta eliminá asina fragmentashon di partidonan polítiko.
