Konforme moshon aprobá
WILLEMSTAD.- Frakshon di partido MAN ke sa si minister di Salubridat Públiko, Javier Silvania, konforme moshon di e frakshon ku parlamento a aprobá unánimemente dia 22 yanüari último, a pone un montante disponibel na supsidio pa Stichting Alzheimer. Tambe e frakshon di ke sa si ta posibel pa inkluí e supsidio/yudansa finansiero aki den e presupuesto supletorio di 2024?
Segun lider di frakshon di MAN, Giselle Mc William e kantidat di kasonan di Alzheimer ta oumentando drástikamente rònt mundu, inkluso na Kòrsou tambe. Alzheimer ta afektá no solamente e pashènt sino e famia kompleto i pa e motibu aki segun Mc William ta importante pa invertí den prevenshon i tambe prepará e pashènt i su famia pa e malesa aki ku ta un peso emoshonal, físiko i finansiero enorme.
“Tambe e ta un peso emoshonal, físiko i finansiero riba e kuidadó “mantelzorg” ku ta kompletamente neglishá pa falta di sosten i atenshon.” Mc William ta mustra ku for di mei 2021 gobièrnu a akordá un maneho pa demensia “Beleidsplan Dementie 2021-2025” entre ministerionan di Salubridat, Medio Ambiente i Naturalesa (GMN) i Ministerio di Desaroyo Sosial, Labor i Bienestar (SOAW).
E plan di maneho tin 5 punto di akshon basa riba rekomendashonnan di PAHO i WHO riba tema importante aki di demensia/Alzheimer. “Un stakeholder den e rapòrt ta Stichting Alzheimer ku ta hasi un tremendo trabou pa por eduká, konsientisá i sostené pashènt i famianan.”
Tambe e fundashon tin e tarea grandi di envolví i konsientisá komunidat riba e malesa di Alzheimer. Esaki ta parti di e maneho di e fundashon ku Mc William ta lamentá ku no ta hasi nada kuné.
Mas aleu e lider di frakshon di MAN ta bisa ku for di un bishita ku e frakshon a hasi i tambe durante reunion di Komishon Sentral di parlamento kaminda Stichting Alzheimer tabata presente a bin dilanti ku e fundashon no ta risibí supsidio di gobièrnu.
Pa e motibu aki Mc William ta bisa ku dia 22 yanüari, durante tratamentu di presupuesto di pais 2024 frakshon di MAN a presentá un moshon pa gobièrnu fondo pa e Stichting Alzheimer por sigui hasi nan trabou na bienestar di nos pashèntnan, nos famianan i nos komunidat. “E moshon a haña sosten unánimemente den Parlamento.”
Frakshon di MAN ke sa tambe si minister Silvania ta na altura di maneho pa demensia di 2021 pa 2025, kiko minister ta bai hasi ku e maneho aki i si minister ta di opinion ku e ta importante pa sostené Stichting Alzheimer.
