WILLEMSTAD.- E ola di violensia na Kòrsou ta afektá sentido di seguridat na Kòrsou negativamente. Frakshon di partido MAN-PIN den un karta pa minister di Hustisia, Shalten Hato ke sa si e minister a hasi òf laga hasi un investigashon riba kousanan di violensia na Kòrsou.
Segun e frakshon e ola di violensia den tur forma na Kòrsou, ta motibu di preokupashon pa e sentido di inseguridat den pais. “Den último añanan nos por a konstatá un kantidat alarmante di bringamentu bou di hóbennan di skol. Tambe, ta konosí ku violensia doméstiko ainda ta un un di e formanan di violensia mas frekuente na Kòrsou”, Mc William ta bisa den su karta pa minister Hato.
Último lunanan ta nota un biaha mas uso di arma di kandela, ku den algun kaso konsekuensia fatal, e parlamentario ta sigui bisa. Ta den e kuadro aki ku e frakshon ke sa si minister Hato tin bista integral di tur tipo di kaso di violensia, e demografia di esnan ku ta envolví ku violensia, víktimanan, i aspektonan ‘sosiográfiko’ (diversidat di bida bou di gruponan den komunidat) di esnan envolví. Tambe ke sa kua ta e medidanan preventivo ku ta tumando pa evitá violensia bou di hóbennan i si e minister tin un plan ku metanan konkreto pa riba término mas largu kombatí violensia na Kòrsou.
Mas aleu Mc William ta puntra si minister Hato tin un struktura kla di koperashon ku skolnan, organisashonnan deportivo i religioso, i otro organisashonnan aktivo den bario pa formashon emoshonal pa hóbennan i kasnan di famia. “Kua ta e formanan di koperashon konkreto dirigí riba e aspekto emoshonal di hóbennan?” Alabes e lider di frakshon di MAN-PIN ta puntra si e minister ti un maneho pa mitigá akseso di hóbennan na arma di kandela.
Finalmente Mc William ke sa kiko konkretamente e minister ta hasi kontra violensia doméstiko, ku den hopi kaso ta e mecha ku ta kondusí na otro tipo di violensia i si e minister ta sinti pa riba término kòrtiku tene un interkambio ku parlamento riba un aserkamentu mas integral di e problema di violensia na Kòrsou.
Foto:
…Giselle Mc William…
