WILLEMSTAD.- Partido MAN-PIN ta eksigí ku minister di Salubridat, Javier Silvania tin ku pidi despensa públiko pa su akusashonnan infundá i inhustu kontra direktor di kas di kuido Betèsda, Natasha Rog. Asina kolaboradó di frakshon di MAN den parlamento, Yael Plet ta deklará.

Plet ta bisa ku ta inaseptabel kon e minister ta trata ku profeshonalnan lokal i den e kaso aki un hende muhé. No por permití ku e minister di e forma aki ta daña nòmber di hende.

Silvania a akusá e direktor di Betèsda di no ta transparente, ladron i korupto. Asta el a bisa ku e direktor mester duna sènnan risibí bèk, Plet ta sigui bisa. “A instruí ofisina di akountent SOAB pa hasi un investigashon finansiero na e instituto i awor ku den nan rapòrt ta konkluí ku nada robes a tuma lugá e minister mester pidi e direktor despensa públikamente.”

Plet ta mustra ku no pasobra Silvania ta un minister esei ta dun’é e outoridat pa mancha nòmber di hende inhustamente. “Mi ta spera ku liderazgo di partido MFK i tambe kabesante di e aktual gobièrnu di MFK i PNP ta sòru ku Silvania ta rektifiká su akusashonnan pasobra no por lag’é ‘get away’ ku e kos aki.”

For di e investigashon a sali ku Betèsda no a hasi nada robes, nada fo’i regla i nada ilegal ku e 2 mion florin ku e fundashon aki a risibí di gobièrnu den forma di supsidio. Tur loke gerensia a bisa ku e lo bai hasi ku e sèn a ser hasí tambe.

E invershon i trabounan a keda denter dje límitenan di destaho i no tabatin mester di pidi mas ku un oferta. No a konstatá nada partikular tampoko den fakturashon dje kompra di materialnan. E fakturanan tabata korekto i di akuerdo ku loke sa ta usual inkluso deskripshon dje servisio òf produktonan ku a kumprá.

Pues no tabatin falsifikashon di, montantenan tabata kuadra i tur kos tabata dirigí na Betèsda. Ademas e produktonan tabata kuadra ku e loke a paga. A usa e sèn ku a haña pa loke e tabata destiná, esta mantenshon.

Den kaso di produktonan ku tabata hopi kostoso, a pidi tres oferta manera ta usual. Segun SOAB, e fakturanan den kaso di kompra di material i sifranan tabata kuadra.

E proyekto i kompra di ‘generator’ tambe a bai den tur transparensia, di akuerdo ku regla i práktikanan ora di kumpra material di suma grandi. Awe e kas di kuido ta disponé di un ‘generator’ ku por suministrá koriente pa henter e kompleho, i esaki ta algu ku a keda instalá ku asistensia di Aqualectra mes.

E ‘generator’ nobo tin sufisiente kapasidat pa suministrá koriente na tur departamento a kaso surgi interupshon di koriente di parti di Aqualectra. Segun Rog, ta hopi importante pa tin klaridat riba e e kompra di generator.

Gerensia a buska diferente oferta i finalmente a skohe pa esun mas barata i ku por a ofresé kalidat tambe. Loke a pone ku mester a gasta un tiki mas sèn for di loke a presupuestá, ta pasobra e instalashon tabata bieu i mester a adaptá esaki.

 

Foto:

…Yael Plet…

LAGA UN KOMENTARIO

Please enter your comment!
Please enter your name here