WILLEMSTAD.- Frakshon di MAN-PIN den Parlamento a entregá un petishon ofisial na Presidente di Parlamento, Fergino Brownbill pa un reunion públiko di Parlamento ku e tópiko: Maneho di gobièrnu relashoná ku aksesibilidat di pueblo na playanan di Kòrsou. MAN-PIN ta di opinion ku playanan ta parti di Kòrsou su rikesa natural i kultura, i mester keda aksesibel pa tur habitante di Kòrsou.
E frakshon ta hopi preokupá ku e tendensia di komersialisashon i privatisashon di playanan, kaminda pueblo kada biaha ta sinti ku aksesibilidat liber ta bira mas limitá. Den su petishon, frakshon di MAN-PIN ta señalá ku hopi famia lokal ta eksperensiá opstákulonan pa disfrutá di playa manera tradishonal tabata e kaso, pa motibu di kostonan haltu, uso eksesivo di stul i fasilidatnan komersial, i situashonnan kaminda parti di e playa ta reservá prinsipalmente pa turista.
Segun frakshon di MAN-PIN, playa no por bira un luho pa esnan ku por paga, sino mester sigui un espasio públiko pa rekreashon, deporte, salubridat i union familiar. Tambe e frakshon ta pidi mas transparensia tokante kontratonan i akuerdonan di maneho di playa entre gobièrnu i sektor privá. “Pueblo tin derecho di sa kiko ta e kondishonnan i kon ta garantisá akseso liber na nos playanan.”
Frakshon di MAN-PIN a pidi ku e minister di Tráfiko, Transporte i Planifikashon Urbano, Charles Cooper huntu ku e minister responsabel pa Salubridat, Medio Ambiente i Naturalesa, Tyron Boekhoudt, ta presente durante e reunion públiko pa duna klaridat riba e vishon i maneho di gobièrnu. Pa MAN-PIN playanan ta di pueblo. “Nos mester protehá aksesibilidat, inklusividat i e derecho di kada hende di por disfrutá di laman sin barera finansiero ni privatisashon eksesivo.”
Presidente di fundashon Vishon Bándabou (VIBA) Selfrin ‘Fanny’ Sambo a entregá e siman aki un petishon formal, firmá pa alrededor di 16.580 siudadano, na Parlamento tokante akseso liber na playa i protekshon di dominio públiko. Segun Sambo, esaki no ta un lucha kontra desaroyo, invershon òf propiedat privá, sino un yamada pa transparensia, kaminda ta pidi pa traha un rapòrt kompleto di aksesibilidat na playanan.
“E minister mester duna splikashon skirbí di e status hurídiko di kada playa, kaminda di akseso, maneho i eventualmente limitashon. Tambe mester publiká un vershon simpel di dokumentonan manera akta di ‘erfpacht’, hür i pèrmit relevante di e playa pa públiko, kaminda siudadanonan tin derecho riba un guia komprendibel ku reglanan, puntonan di akseso i informashon tokante unda nan por entregá keho. Alabes mester kontrolá si limitashonnan aktual di akseso na playa ta den liña ku Kódigo Sivil i ‘Landsverordening Domaniale Gronden’.”
VIBA ta di opinion ku Parlamento mester investigá si akuerdonan aktual i kontraktual no ta perhudiká interes públiko. Pueblo tin derecho di sa, kua playa ta públiko, kua restrikshon ta legal, i riba kua base por limitá akseso. E fundashon ta pidi pa gobièrnu i Parlamento tuma nan responsabilidat i hasi tur dokumentashon, akuerdonan i maneho tokante akseso na playa mas transparente pa pueblo.
P’esei VIBA ke pa Parlamento tuma akshon i pasa un moshon, kaminda ta pidi gobièrnu presentá tur dokumento i rapòrt na Parlamento den un término di tempu konkreto. P’esei mester yama un reunion públiko kaminda mester tene un diálogo transparente ku e minister, Domeinbeheer, ekspertonan hurídiko i empresarionan pa trata e asuntu aki públikamente, e fundashon ta trese dilanti.
