WILLEMSTAD.- Manera MAN-PIN a pronostiká den pasado e kresementu ekonómiko di Kòrsou a bira un realidat. Ta den e kuadro akí MAN-PIN ta presentá awor tambe ku e solushon pa retonan logístiko ku e kresementu ekonómiko akí ta trese kuné. Melvin ‘Mac’ Cijntje ku a djòin e kombinashon di lista ta presentá ku solushonnan spesífikamente pa e retonan ku Bándabou ta konfrontá ku tráfiko.
“Hendenan ku ta biba na Bándabou tin ku lanta for di 4’or òf 5’or di mardugá pa prepará, baha muchanan i yega trabou pa mas tardá 8or. Si sigui asin’aki ku e kresementu ku ta tumando lugá, hendenan di Bándabou mester lanta 3or di mardugá”, Asina Cijntje ta trese dilanti.
Atardi segun e kandidato riba lista di MAN-PIN no ta muchu otro. “Ora trabou kaba abitantenan di Bándabou mester resa i pidi Dios pa no tin aksidente riba kaminda di Bándabou pasobra na lugá di yega kas 6or ta yega te 8or di anochi. Pa e motibu akí MAN-PIN a bini ku e strategia kon pa laga Kòrsou sigui krese pero tresiendo solushon pa retonan manera esun pa área di Bándabou.”
Den e kuadro akí Cijntje ta bisa ku ta proponé pa kambia e profil di e kaminda prinsipal ku ta bai Bándabou, Weg Naar Westpunt. E profil ta konosí komo ‘2 plùs 1’. Esaki ta enserá ku e tráfiko den ámbos banda riba Weg naar Westpunt ta kambia kada 1 kilometer di 1 ‘rijstrook’ bira 2 ‘rijstrook’.
“Si ta kore tras di un trùk grandi por ehèmpel, no tin purá pa pas’é pasobra despues di 1 kilometer tin un chèns di pas’é sin kousa peliger den tráfiko. Segun Cijntje e modelo akí ta hopi sigur. Mas aleu e ta proponé pa na haltura di Seru Grandi i Harmonia traha un plenchi di preferensia.
Esaki ta pa obligá outomobilistanan baha velosidat i duna oportunidat pa e tráfiko ku ta sali for di e dos barionan aki subi e kaminda prinsipal. Tambe Cijntje ta proponé pa traha un kaya ku ta pasa patras di Curaçao Oil terminal (COT) bai sali riba Weg naar Willebrordus kaminda por kore maksimal 80 kilometer pa ora pero ku outonan no mag di pasa otro.
E kaya aki por kousa ku na haltura di e krusada na Betesda tráfiko ta pega. “Riba esei tambe MAN-PIN a pensa un solushon. E idea ta ku ta kita e lusnan di tráfiko i pone un asina yama “turbo rotonde”.
Adishonalmente Cijntje ta proponé pa traha un brùg ku ta konektá e bario di De Savaan ku un otro kaya ku ta pasa dilanti Betesda i lora bai direkshon di e supermerkado ku tambe ta keda na haltura di e mesun krusada. “Esaki ta ideanan ku nos tin pa hasi e kayanan ku ta bai Bándabou mas sigur i tambe ku por karga mas kapasidat.”
Cijntje ta mustra ku ta trahando un hotèl grandi na Sta. Martha i ora ku esaki ta kla ta tur dia lo transportá 600 turista di aeropuerto pa Sta. Martha, usando un di 2 kamindanan ariba deskribí. “Mester sòru ku e kamindanan aki ta sigur.” Asta Cijntje ta proponé ku por introdusí e posibilidat ku mester paga pa pasa riba e kaminda nobo ku ta traha di Betesda bai Bándabou.
Pa kumpli ku esaki e ta proponé pa na final di e kaminda ku ta pasa patras di Bullenbaai traha pida kaya elevá pa e tráfiko ku ke subi Weg Naar Westpunt. “Mas outo hasi uso di e kaya ku ta pasa via Bullenbaai, e ta bira un problema pa via Weg naar Willebrordus lora na man robes subi Weg naar Westpunt i vise versa.”
Pa finansiá e proyektonan akí di infrastruktura Cijntje ta proponé pa hasi uso di e fórmula “Design, Build, Finance, Opetrate and Maintain”. “No mester di sèn pa traha proyektonan grandi asin’aki. Aruba a traha 2 proyekto ku e fórmula akí resientemente ku e eksepshon ku no a duna esun ku ta konstruí e kaminda e derecho pa operá esaki.”
A base di e modelo akí ta e kontratista mes ta diseñá i finansiá e proyekto. “Por pensa asta pa kobra outomobilistanan pa usa e kaya nobo ku ta pasa tras di Bullenbaai”, Cijntje ta finalisá bisando.
Foto:
…Melvin ‘Mac’ Cijntje…