Plet: Oumento di gastu di awa i gasolin ta un sla mortal pa pueblo
WILLEMSTAD.- E oumentonan resien anunsiá di preis i tarifa di gasolin, disel, awa i koriente ta un sla mortal pa pueblo di Kòrsou. Pa e motibu aki e partido ta hasi un yamada atrobe riba gabinete Pisas pa presentá den Parlamento ku un pakete di alivio pa henter pueblo di Kòrsou. Asina kolaboradó di frakshon di MAN-PIN den Parlamento, Yael Plet ta trese dilanti.
E ta bisa ku MAN a tuma nota di e anunsio di oumento di preis di gasolin i disel pa 29 sèptèmber, siguí pa pa un oumento drástiko di preis di awa ku 71 sèn i koriente dia promé di òktober. “E anunsio aki ta un sla duru pa tur kas di famia kaminda den un tiru ta konosé oumento di kosto di bida. E nesesidatnan básiko pa un kas ta birando mas karu i e pòtmòni ta birando mas chikí.”
Esun pober manera e adultonan mayó, ku ta kobra solamente AOV, i kobradónan di ònderstant ta bira mas pober i no por ni sobrebibí mas, Plet ta bisa mas aleu. E klase medio, esta e dosente, e trahadó den kuido, èts. tambe ta kai tiki tiki, pero sigur, den pobresa. “Nos ta konsiente di e desaroyonan mundial, pero esei no ta kita ku gobièrnu tin un responsabilidat pa duna pueblo alivio di un oumento drástiko di kosto di bida.”
Plet ta sigui duna di konosé ku e oumento aki ta nifiká un influensia negativo riba bida di hende. Bida lo bira mas karu pa tur kas di famia. Kuminda, un nesesidat di tur hende, lo bira mas karu banda di awa, koriente i gasolin ku tambe ta esensial den bida di tur dia. “Ya kaba ofisina sentral di statistik, CBS a mustra ku hopi kas di famia tin problema finansiero i pa kumpli ku nan gastunan básiko. E klase medio den nos pais ta birando mas pober dia pa dia.”
Ta pa e motibu aki Plet ta bisa ku partido MAN ta bolbe hasi un yamada na gabinete Pisas pa presentá den Parlamento i pasa un pakete di alivio pa henter pueblo di Kòrsou. E partido asta ta presentá ku proposishonnan pa un tipo di pakete di alivio asina ku e meta pa mantené e forsa di kompra di siudadanonan. Ta proponé entre otro kompensashon pa kasnan di famia ku ta bou di un sierto límite di entrada. Tambe ta proponé un karchi pa esnan mas vulnerabel por kumpra komestibel, i pa energia i transporte públiko kuné.
Otro proposishon di MAN ta pa baha OB riba gasolin, diesel, flete i seguro riba flete. Finalmente Plet ta atvertí ku e oumento di kosto bida aki ta un sla duru pa tur kas di famia i komersio, i no por sinta ketu i laga e oumento aki krea doló den pueblo.
