CHESAPEAKE, MERKA, AFP.- Un manager di 31 aña di Walmart a tira seis hende mata den un tienda kompletamente yen ku kliente promé ku el a tira su mes, segun indikashon di outoridatnan djárason. Esaki ta e segundo tiroteo masivo den Merka den solamente kuater dia.
Kuater persona mas ta hospitalisá i nan kondishon no ta konosí despues di a insidente na Chesapeake, Virginia, segun indikashon di e hefe polisial Mark Solesky.
Solesky a konfirmá na reporteronan ku e hòmber a muri despues ku el a tira su mes mata, añadiendo ku e motibu tras di e atake no ta konosí ainda.
Outoridatnan di e siudat a konfirmá e sospechoso komo Andre Bing. Walmart a konfirmá den un komunikado ku Bing tabata forma parti di un ekipo ku ta operá den oranan di anochi i tabata traha na e kompania desde 2010.
Un empleado ku yama Briana Tyler, kende a sobrebibí e atake a deskribí kon e manager a drenta den e kamber kaminda e empleadonan ta tuma nan break i a kuminsá tira. El a añadí ku Bing no a punta riba niun hende spesífiko i ku el a kuminsá tira tur kaminda den e kamber.
Tyler a bisa na ABC ku e manager a wòrdu deskribí komo un persona ku un karakter difísil.
Na momentu ku polisnan a yega nan a haña dos víktima i e sospechoso morto den e kamber di empleado i un kadaver tabata na entrada di e tienda. Tres persona ku a keda hospitalisá a muri.