Ku ehekushon di paketenan di pais
WILLEMSTAD.- Un di e motibunan dikon tin tardansa den ehekushon di proyektonan deskribí den e paketenan di pais ta maneho di rekurso humano antikuá i defisiente. Asina minister hulandes di Asuntunan Interno i Relashonnan den Reino, Judith Uitermark, ta indiká den kontesta riba preguntanan di parlamento Hulandes.
Parlamentarionan hulandes ke sa entre otro kiko ta motibu pa e tardansa den ehekushon di proyektonan den kuadro di trabounan ku e Tijdelijke Werkorganisatie ta hasi i alabes kiko ta e falta di kapasidat riba e paisnan den Karibe. E minister ta bisa ku ta konosí ku e forsa pa por ehekutá proyektonan ta limitá den e paisnan den Karibe. Por aliviá e situashon akí parsialmente poniendo kapasidat eksterno disponibel debí na e interes pa e paisnan mes tuma rienda di e proyektonan i garantia duradero di e resultadonan final den e organisashonnan konserní.
E skarsedat tin influensia tantu riba realisashon komo ehekushon di proyektonan. E elekshonnan parlamentario resien riba tur tres pais den Karibe tabatin alabes komo konsekuensia ku a posponé toma di desishon gubernamental te despues di instalashon di e gobièrnunan nobo.
No por identifiká e kousa di e falta di kapasidat klaramente. Konosementu i eksperensia spesialisá ta skars riba e islanan i hendenan altamente eduká hopi bia ta opta pa un trabou den eksterior òf den komunidat empresarial. Polítika di rekurso humano antikuá òf inadekuá den organisashonnan di gobièrnu tambe ta hunga un ròl, Uitermark ta sigui splika.
Pa e motibu akí, den kuadro di e paketenan di pais, ta duna prioridat na tur pais na pone organisashonnan gubernamental na òrdu, inkluyendo e funshon di rekurso humano i e funshon legislativo. Tambe ta promové e uso di IT ku e meta pa rashonalisá i simplifiká prosesonan di trabou.
Pa loke ta e medionan finansiero ku a pone te ainda disponibel pa e proyektonan menshoná den e paketenan di pais e minister hulandes ta bisa ku e medionan aki ta kanalisá kompletamente via e presupuesto di relashonnan den Reino. E Tijdelijke Werkorganisatie a saka na 2024 19,4 mion euro den kuadro di ehekushon di e paketenan di pais.
Ta trata aki di tantu finansiamentu di proyektonan komo tambe gastunan di kolaboradónan di e Tijdelijke Werkorganisatie, di otro departamentonan spesialisá hulandes i ekspertonan ku ta hür pa yuda e aparato gubernamental di e paisnan den Karibe ehekutá proyektonan spesífiko. Banda di esakinan a pone 3,2 mion euro disponibel pa Kòrsou den kuadro di e proyekto di mantenshon di skolnan. Esaki ta parti di e palabrashon for di 2020 ku Hulanda lo pone 30 mion euro disponibel pa drecha infrastruktura di skolnan.
