Minister a pone un sonrisa riba kara di manifestantenan

WILLEMSTAD.- E manifestantenan di Isla, pues tantu trahadónan komo dje kompania komo esnan di kontratista a disidí di akudí na residensianan di tantu Minister Suzy Camelia-Römer komo sr. Steven Martina pa ekspresá nan preokupashon pa e situashon ku ta reinando. Mester bisa ku e aserkamentu di kas dje mandatarionan a bai di un forma pasífiko, di tal manera ku e dos mandatarionan a asta sali i papia ku nan pa splika den liñanan grandi kiko a sosodé den e negosiashonnan te awor pa por yega na un partner nobo pa Isla.

Di su parti sra. Camelia-Römer a laga e grupo komprondé bon kla ku su punto di salida ta ku e refineria tin di keda habrí. E deliberashon i kombersashon na porta di kurá aya a resultá den un enkuentro entre e minister i e manifestantenan pa awe tardi.

Di su parti, sr. Martina tambe a dirigí palabra na e grupo i a splika nan di te kaminda e sa di e negosiashonnan. Ambos mandatario a trankilisá e grupo refutando ku gobièrnu lo ta kanando un trayekto di tal sistema ku ta bai sera Isla.

Sr. Martina a referí na e último desaroyonan kaminda un “preferred bidder” a distansiá su mes. Den e kaso aki segun e mandatario, den negosiashon no semper ta akseptá un “no”, sino ku ta bai aserká e interesado ei pa sa kiko tabata e motibunan di su desishon pa wak si tòg lo por akomodé. Den kaso ku a disidí ku tòg e no ke negoshá mas, anto e ta definitivo.

SHARE

LEAVE A REPLY