PAROTANI, BOLIVIA (AFP).- Algun shen siguidó di Evo Morales ayera a blòkia e kamindanan di komunikashon dje departamento di Cochabamba, den sentro di Bolivia, riba e di dos dia di blòkiamentu di kaminda kontra e probabel aresto dje eks presidente pa supuesto abusu di un menor durante di su mandato.
E dirigente kampesino Humberto Claros a denunsiá na AFP ku e gobièrnu ta tras di “e persekushon polítiko hudisial grave” kontra dje eks mandatario, kende segun fuentenan di su partido ta skondé den e provinsia di Chapara, na Chochabamba.
“Ta algu hopi robes e loke nan ta hasiendo kontra di e ruman Evo Morales. “Ta un proseso ku nan a hinka den otro, nan a plania e kosnan ei”.
Ku piedra i tera, e manifestantenan a kòrta e kamindanan ku ta konektá Cochabamba, kaminda Morales tin su base polítiko, ku e siudatnan di La Paz, Sucre (zùit) i Santa Cruz (ost), segun e kompania estatal Autoridad Boliviana de Carreteras (ABC).
ABC ayera a raportá dos ruta mas blòkiá, p’ayera awor nan a bira tres.
Den Parotani, un pueblo riba e ruta entre Cochabamba i La Paz, pa di dos dia siguí tabatin enfrentamentu entre manifestantenan i outoridatnan.
E manifestantenan a tira ku piedra i a sende kandela. Polis a respondé ku gas lakrimógeno, pero no a logra habri e kaminda bèk.
E kaso
Morales, e promé indígeno ku a goberná Bolivia entre 2006 i 2019, ta bou di investigashon pa delitonan di tene relashon ku mucha bou di edat i tráfiko di persona”.
Ministerio Públiko di Tarija ta bisa ku Morales den 2015 tabatin relashon ku un menor, tempu ku esaki tabatin 15 aña, i ku un aña despues e hóben a duna lus.
Morales siman pasá a nenga na komparesé dilanti di ministerio públiko. E fiskal dje kaso, Sandra Gutierrez, a atvertí ku por saka un órden di aresto kontra di su persona.
Gutierrez na fin di sèptèmber ya a emití un órden di aresto kontra di Morales, pero hustisia a anulá esei despues di un apelashon.
