Yamada pa tur ku tin petishon aden pa akudí
WILLEMSTAD.- Plataforma Bándariba ta invitá tur siudadano ku ta den espera pa haña un tereno sea pa konstruí kas òf pa plantashon, ku ta warda pa pasa un tereno riba nan nòmber, òf ku ta warda pa legalisá e tereno ku nan a traha nan kas riba dje, pa akudí djárason 13 di mei awor pa 8’or di mainta na lugá di stashoná outo di Biblioteka Públiko na Skalo. E invitashon ta a base di desishon ku a tuma durante e reunion di Plataforma Bándariba di djárason 6 di mei último na Sentro di Bario Sta. Rosa.
Intenshon ta, ku ta kana di e lugá di stashoná outo di biblioteka pa ofisina di Domeinbeheer. Tur hende mester bini ku kopia di nan faktura (“voorschotnota”) ku ta prueba ku nan a paga Domeinbeheer i tambe kopa di e number di dokumento (“povo nummer”) tantu esun bieu komo esun nobo. Ta pone tur e dokumentonan den un buzon pa entregá esaki na hefe di Domeinbeheer.
Alrededor di 120 persona a asistí na e reunion di 6 di mei. Presidente di Plataforma Bándariba, Elvin Gerard ta bisa ku ta hendenan a bini di Bándabou te na Sentro di Bario Sta Rosa pa e reunion. Huntu a disidí ku ta basta i ku ta bai Domeinbeheer i eksigí pa haña un kontesta.
Segun Gerard tin hende ku tin 40 aña ta warda riba un desishon di gobièrnu miéntras ku nan ta mira ku estranheronan si ta keda kla ku nan petishon pa traha kas, negoshi òf kualke otro proyekto. Ta e intenshon ku ora kana bai Domeinbeheer djárason 13 di mei ku alabes ta manifestá kontra e echo ku no ta atendé e petishonnan. “Hendenan por bini ku nan pankarta pa asina demostrá nan malkontentu”, Gerard ta bisa.
E ta enfatisá ku e lo ta un manifestashon pasífiko i trankil. Meta ta pa siudadanonan haña sa ki dia Domeinbeheer por duna nan un kontesta. “Despues ku entregá kopia di tur e dokumentonan lo duna 3 luna di tempu pa Domeinbeheer duna e siudadanonan un kontesta ofisial pretu riba blanku di ki dia ta kaba di atendé ku nan petishon.”
Gerard ta pidi tur hende di edat pa bini ku un stul pa asina nan por sinta i sosegá e pianan ora mester. E ta bisa ku práktikamente tur eks minister i diputado tabata bisa hendenan den pasado pa traha nan kas riba un pida tereno ku e famia haña òf kualke otro pida tereno, i ku despues lo legalisá esaki. “Pero despues ku e hendenan a kaba di traha nan kas no tabata kontestá nan yamadanan ku e petishon pa pasa e tereno riba nan nòmber òf legalisá e tereno ku nan a traha nan kas riba dje.”
