Studiantenan universitario, opositornan di gobièrnu di Maduro i famia i amigunan di prezunan polítiko a tuma parti na e promé demostrashon grandi di oposishon pidiendo libertat pa e prezunan polítiko.
CARACAS (AFP).- E promé manifestashon grandi di oposishon despues di kaida di Nicolás Maduro un luna pasá, a reuní míles di persona den e kapital di Venezuela i esaki promé ku aprobashon di un históriko lei di amnistia.
Bou dje gritu “Nos no tin miedu!”, míles di hende a reuní ku pankarta i bandera alrededor dje prinsipal universidat dje pais, den Caracas, riba yamada dje movementu estudiantil den konmemorashon di dia di hubentut. E konsentrashon ta e promé manifestashon di e magnitut akí na Venezuela for di despues ku Merka a kapturá Maduro den un operashon militar dia 3 di yanüari, ku a inkluí bombardeo den e kapital i otro regionnan dje pais.
Delcy Rodriguez, kende tabata su vise presidente, a asumí poder bou di preshon norteamerikano, a duna señalnan di fin di e represhon karakterístiko di e 27 añanan di gobièrnu chavista. ”Amnistia awor”, por lesa riba un pankarta poné na entrada di Universidad Central de Venezuela, kaminda e manifestantenan tabata grita “Ni un, ni dos, laga nan tur bai” pa loke ta trata e petishon di libertat pa algun shen prezu polítiko ku ainda ta den prizòn.
E organisashon Foro Penal ta referí na mas ku 600 prezu pa rasonnan polítiko kendenan ainda ta spera di sali for di prizòn den un proseso ku a start dia 8 di yanüari.
Tambe t’asina ku Parlamento tin intenshon pa kuminsá ku e debate final pa aprobashon di un lei di amnistia general ku lo habri kaminda pa liberashon masivo di prezunan polítiko.
“Venezuela lo ta liber… Biba nos studiantenan”, segun selebrashon dje lider opositor i ganadó di premio Nobel di Pas, Maria Corina Machado, riba X, ku un video ku ta mustra parti di e konsentrashon di manifestantenan. Hopi di nan tabata bistí ku e típiko kamisa blanku di oposishon. Chavismo tambe a konvoká un manifestashon den sentro di Caracas reuniendo míles di persona.
Simpatisantenan di Nicolás Maduro tambe a tene un manifestashon den Caracas, ekspresando nan sosten pa liberá e èks-presidente venezolano.
