UTRECHT, HULANDA (AFP).- Ku e gritu “bosnan no ta so”, míles di persona a konsentrá ayera den Utrecht, den wèst di Hulanda, pa protestá kontra dje viktoria dje kandidato ultraderechista Geert Wilders den e elekshonnan legislativo un dia promé.

Na Amsterdam tambe tabatin otro manifestashon kontra dje partido dje derecho ekstremo di Wilders. E miembronan di formashonnan di iskierda a organisá e protesta di Utrecht “pa demostrá ku nunka lo no bandoná ningun hende i ku nos lo lucha pa derechi di un i tur”, segun e organisadónan a bisa.

Ku e 37 asientonan ku nan a gana, e partido di Wilders pa promé biaha a bira e forsa di Parlamento hulandes.

Ounke el a suavisá su deklarashonnan anti-islam durante dje kampaña elektoral, e manifiesto di  Partij Voor de Vrijheid (PVV) ta pidi prohibishon di meskitanan i di Coran.

Judy Karajoli, un studiante sirio di periodismo di 25 aña, a trese dilanti ku e viktoria elektoral di Wilders a dun’é ”hopi miedu pasobra PVV ta un partido rasista ku ke ‘desislamisá’ e pais.

Karajoli a bisa ku hopi di su amigunan ta refugiadonan ku pèrmit di residensia kendenan awor, ta teme pa nan futuro. E manifiesto di PVV ta indiká ku e pèrmitnan di residensia mester keda anulá pasobra “algun parti di Siria ya ta sigur”.

“Ami sa kiko ta nifiká hui di guera pa refugiá den un pais kaminda  tin seguridat, pero awor nos ta sinti ku esei no tei mas”, segun el a deklará.

Despues dje viktoria di derecho ekstremo den Parlamento, Geert Wilders mester konvensé otro partidonan pa forma un koalishon di gobièrnu, un tarea ku lo no ta fásil.

PVV a gana 37 dje 150 asientonan ku tin den Parlamento, mas di dòbel kompará ku  elekshon di2021, di akuerdo ku e resultadonan.

Na nivel  europeo tambe por bisa ku e resultado di elekshon na Hulanda a sakudí Brussel. Union Europeo regularmente ta risibí kritiká  di Wilders i den e kampaña elektoral inkluso el a primintí un referendum riba “Nexit”, un eventual salida di Hulanda for dje bloke europeo.

Sinembargo, analistanan ta señalá ku e yegada di Wilders na e mesa prinsipal di mandatarionan europeo lo no tuma lugá.

Segun Benoit Rihoux, profesor di Universdat Katóliko di Leuven (Belgika), Wilders ta haña su mes obligá di hasi konseshonnan pa e por haña aliado i forma un koalishon.

LAGA UN KOMENTARIO

Please enter your comment!
Please enter your name here