Maramentu di kabes ta masha ‘in’ últimamente. Pero e ta algu ku ta data pa siglonan kaba. E tin su nifikashon, i por us’é pa tur okashon. Najhilah van Dinter a hasi esaki parti di su bida diario. Kuminsá mara kabes na Hulanda i awor na Kòrsou ku Krea Headwraps.

 

Sali for di kas ta mara lensu…

El a konta nos di Djasabra, ku, su mama Senaida van Dinter, ku tin mas di 40 aña  ta mara lensu tradishonal. El a lanta den kas ta mira su mama ta mara lensu tur ora. I no ta okashon so hende ta mara lensu, pero ta henter aña su mama ta mara lensu, pa fiesta i asta ta mara esnan chikí pa pone bolo aden. Temporada di seú ta lokura total. Najhilah ta bai drumi laga hende na kas i ta lanta mainta ainda su mama ta mara lensu. El a bisa su mama ku e si nunka lo hasié, Pero awor ku e tambe ta den dje, su mama ta orguyoso di dje, pasobra el a sigui su pasonan.

 

Eksperimentá ku shal…

Najhilah a biba na Hulanda kaminda semper e tabatin kabei di straight. Dia el a disidí di bai natural, e tabata lucha pasobra tin dia e kabei no ke peña. Ora e laba kabei, kueru di kabes ta keda friu, i asina el a kuminsá eksperimentá ku shal. Esei tabata den aña 2012 pa 2013. I di shal el a pasa pa otro tela. Despues di tempu el a mira ku e kos a bira algu di moda i el a bira mas kurioso i buska informashon. Asina el a eksperimentá e mes, subi YouTube, buska mas i mas informashon i a komprondé ku djis un pida tela bo por asentuá bo trahe, den algu bunita.

 

Kambia nos ‘mindset’…

Dia e tabata bin Kòrsou el a disidí di bai den e direkshon aki. E ta algu bunita i algu di nos i e ta un reto pasobra ta un ‘mindset’ ku mester kambia. Pero Najhilah a bai pe. I dia el a bin Kòrsou el a kuminsá ku Krea Headwraps. E nòmber segun Najhilah ta algu ku a lag’é pensa hopi. El a dal den krea, i a sigui pensa. El a drumi lanta ku e “krea” den kabes, te el a yega na Krea Headwraps.  Esaki pasobra e ta krea e ‘wrap’ pa e hende lora rònt di su kabes i e persona mes ta hasi su kreashon, usando su kreatividat. E nòmber di Krea Headwraps ta papia pa su mes segun Najhilah.


Tela na midi…

Segun su splikashon mas aleu, e ta bende tela. E ta kòrt’é na midí i kose i ku su ‘label’ nèchi empaketá. I ora kumpra un ‘headwarps’ serka dje, e ta mar’é. I asina e tin interkambiá ku e kliente ku por hasié tur tipo di pregunta. E ta duna e oportunidat ei na su klientenan. E no ta duna e lensu kla mará pero si kla na midí. E ta traha si ku Sarel Products ku ta bende produktonan pa kabei i huntu nan a krea dos modèl di ‘wraps’ pa kabes ku ta kla kaba i no tin mester di mara.

I pa esun ku ke siña mas, Najhilah ta organisá dos a tres bia pa aña tayernan ‘Headwraps and more’, i ta kombin’é ku otro artista. E ta kòrda di a hasié ku su mama tambe i einan a duna tur informashon di e tipo di lensunan i nan nòmber. Na  e okashon ei el a hasi e parti moderno i su mama e parti di lensunan mas di pasado. Najhilah ta mas den modernisashon di e tela pa usa pa mara kabes.

 

Okashon no ta importá…

E no ta mira aktualmente ku ta wòri ku okashon. Esta ku tin un tipo mara pa kabes, pa kada okashon. Najhilah a bisa ku Headwraps tabat’ei semper. For di tempu di Afrika, Egipto hende tabata mara nan kabes. E tabata un forma di herarkia. E tabata un status sosial, pa bisa ki status e hende tin den komunidat. E sa ku tin kaminda ora mara e lensu na banda drechi, ta nifiká ku e persona ei ta kasá i tin yu i e otro banda ta soltero. Asina tin maneranan di mara ku ta un wela, un viuda etc., etc. Kada wrap tabatin su nifikashon. I meskos kada tela tin su nifikashon. Na Ghana tin telanan ku su nifikashon. Tin asta tela spesial pa entiero. Pero awor aki el a bira mas un símbolo di moda. Ounke e identidat ta keda, pero hopi hende no ta preokupá pa okashon.

 

Papilon ta gusta…

Por mara kabes pa kasamentu manera na Afrika nan ta hasié segun nan tradishon. Na Kòrsou no ta tene na un tradishon. Ounke na Kòrsou nan gusta e Papilon ku ta e básiko, ta kue di patras bin dilanti i na Kòrsou ta for di tempu di katibu, nan tabata mara nan kabes ora nan ta limpia kas di hende blanku pa nan kabei no kai abou i susha e kas. Riba plantashinan nan tabata mara kabes, pa protehá di solo. Den Latino Amérika katibunan tabata us’é pa skonde oro. E papilon a bira mas moderno i ta mar’é mas den frenta i mas ariba.

Tur tipo di hende…

Un ‘headwraps’ ta bai ku tur tipo di hende i forma d kara? Riba esaki Najhilah a bisa ku e hende mes tin di sinti si e mará di kabes ei ta bai kuné. No tin un regla di ken tin di mara tal forma pasobra e kara ta rondó òf smal. Ta dor di eksperimentá, bo ta sinti ora mar’é i kon el a keda. Tin dia bo mes ta sinti ku e no ta bai.

 

Pone orea bou di e tela…

I ora mara kabes, renchi orea ta e toke final. Dependé e trahe ta wak kua renchi orea ta usa, Por usa unu grandi òf chikí, tur kos ta dependé kiko e hende ke i ta sinti. E ta rekomendá pa ora ta mara e kabes, hinka e orea bou di e tela pasobra dor di keda henter dia den moveshon, e tela por hala, i si mar’é riba orea e ta hala i kita for di bo kabes. I tin di e mará nan tin kònòpi i otronan ta djis drei rònt di kabes i wanta e puntanan bou di e tela mes.

 

Un reto…

Najhilah a bisa ku esaki ta un reto na Kòrsou, ounke e ta mirando kambio. Dia el a kuminsá hendenan ta duda, keda wak. Kòrsou ta hopi mará na aktividat, por ehèmpel den seú, karnaval tur hende ke e wraps pero despues  e ta baha. Pero tiki tiki e hende ta pidi mas pe i ke mara e kabes. Tiki tiki e pensamentu ta kambiando. I no nesesariamente segun Najhilah tin di kumpra un tela serka dje. E mes ta gusta mira hende ku kabes mará i mas ainda pasobra tòg ta algu di nos, nos identidat ta lanta kabes bèk.

 

Punta di Skalo…

Najhilah no ta maradó di e lensunan ku ta usa den seú. Tin di nan ta fásil manera e tres punta òf punta di Skalo. I prinsipalmente e punta di Skalo, ora tende su historia, e ta atraé mas segun Najhilah. E tipo di mará aki, manera su mama Senaida a kont’é, ta ku e hendenan muhé tabata bai un skina di Skalo i tabata mara nan kabes mesun forma pa bai tuma e piska. I nan ta pone nan baki piská riba nan kabes. I komo tur tabata mara e kabes mesun forma a yama e mará ei punta di Skalo. Pero Najhilah a bisa ku  e ta bai pone un dia spesial, pa e bai sigui un kurso serka su mama. Loke su mama ta hasi ta algu inkreibel i kasi no a sobra hende na Kòrsou ku e arte ei den man i no por lag’é bai pèrdí. E ke siñ’é.

 

Pinta riba muraya den sentro di siudat…

I Najhilah ta hopi inspirá den arte di pintamentu. El a splika Djasabra ku el a traha bon ku Jomar, un pintor venezolano ku ta biba aki. El a gusta mira e pinturanan den eksterior i aki no tabatin esei. Najhilah a bin ku e idea pa pinta, nan hende di koló i ku kabes mará, den Punda i tambe den e proyekto di Kaya Kaya.

 

Satin ta kuida kabei…

Tin aktualmente personanan di edat basta hóben tambe ta gusta e tendensia di mara kabes aki. Najhilah a splika nos ku, por mara kabes pa tapa solo, pa asina por kuida e kabei prinsipalmente  pa esnan kabei natural. I den e kaso aki e ta rekomendá e tela di Satin ku ta masha bon ounke tin hopi hende ta gusta e katuna. Pero pa drumi anochi por ehèmpel ta bon pa mara kabes ku un tela di satin pasobra e ta manera e ‘moist’ den e kabei.

 

Un tiki di historia…

Un tiki di historia; Najhilah a a bisa ku den siglonan 18 na Merka, a prohibí e hendenan ku nan kabei afro pa kana rònt asina ei. Tur hende obligatoriamente mester  a mara nan kabes. E tabata símbolo di sklabitut. Nan ta bisa asta ku ta e hende blanku tabata yalurs riba e tipo di kabei di e hende di koló i p’esei a pone ku e gobièrnu a hasi un obligashon pa mara e kabes. Pero di e kos malu ei, a bira un rebelion i tòg a saka algu positivo for di dje ku te e maramentu di kabes.

Tur hende por mara nan kabes pero ta bon pa sa su historia, ta bon pa sa ku e ta un símbolo di identidat, ku tin nifikashon pa hopi hende.

 

Tenta…

Najhilah ta kòrda kon tempu e tabata biba na Hulanda i ora e bin Kòrsou ku fakansi i kana ku su kabes mará, ta yen kos e ta tende riba kaya,. Hende tabata manera tent’é, pero al final di e tentamentu ei, el a saka loke mas ku e ta gusta awor ku ta e Krea Headwraps.

 

A wanta ku tayernan…

Debí na COVID el a wanta ku e tayernan pasobra e mester ta hopi serka di e hende dor di mara e kabes. P’esei el a wanta ku e tayernan pero ta hasi videonan online i semper si hende tin pregunta por tuma kontakto kuné. Krea Headwraps ta un djòp pe. E sa ku aktualmente ta tempunan difísil i kos ta bai un wantá. I  e no tin bèrgwensa di bisa esaki pasobra e empresanan chikí a sinti e COVID hopi. No ta su fuente di entrada pero e ta keda hasié pasobra e ta gusta kiko e ta hasiendo.

LAGA UN KOMENTARIO

Please enter your comment!
Please enter your name here