Marco Rubio ku e siman akí ta realisá bishita importante pa vários pais di Karibe.
KINGSTON, Jamaica (AFP).- E hefe di diplomasia norteamerikano, Marco Rubio, a yega Kingston, Jamaica, komo parti di un gira den Karibe enfoká pa buska solushon pa e violensia den Haiti i respaldá Guyana, riku na petrolio, den su disputa ku Venezuela.
E sekretario di estado norteamerikano ayera a asistí na e kumbre di Komunidat di Karibe (CARICOM), durante kua el a reuní ku lidernan di Haiti, Jamaica, Barbados i Trinidad and Tobago, miéntras ku awe lo e bishitá Guyana i e bisiña Surnam.
“Rumbo pa Jamaica pa reuní ku sosionan karibense pa fortalesé seguridat di nos hemisferio i kombatí krímen transnashonal. “Nos lo traha huntu pa kombatí inmigrashon ilegal, e violensia i kontrabanda den nos region”, segun Rubio a skibi riba X.
Rubio a eligí Amérika Latina pa su promé biahe pa estranhero komo sekretario di estado, ku un tema importante den su agènda: prevenshon di migrashon.
E meta ta pa manda un mensahe bon kla ku Merka a konbertí e kontinente merikano den un prioridat, segun bosero di Departamento di Estado, Tammy Bruce.
Lo e papia prinsipalmente riba seguridat energétiko i kon pa redusí e dependensia di paisnan karibense for di petrolio venezolano.
Lo ta e di tres sekretario di estado konsekutivo ku ta bishitá Guyana, ku ta konta ku un dje reservanan di krudo mas grandi di mundu pa kapital.
E petroli ta konsentrá den e region frontera ku Esequibo, disputá pa Venezuela.
Na kuminsamentu dje luna akí, Guyana a denunsiá presensia den su awanan teritorial di un barku militar di Venezuela, dirigí pa Nicolas Maduro, kende Merka no ta rekonosé komo presidente legítimo.
