BUCAREST, RUMANIA (AFP).- E promé minister saliente di Hulanda, Mark Rutte (57), ayera a keda komo e úniko kandidato pa dirigí  North Atlantic Treaty Organization (NATO), despues ku e presidente rumano, Klaus Johannis, a retirá su kandidatura.

Di akuerdo ku e presidensia di Rumania, Johannis a komuniká na e otro dirigentenan di NATO su desishon pa retirá su kandidatura i ku di forma dirèkt su gobièrnu lo apoyá Rutte.

E funshon ta eksigí e unanimidat di e 32 paisnan dje aliansa i Rutte, komo úniko aspirante pa e funshon, parse di a alkansá esei.

Veterano di polítika europeo, hopi lihé el a risibí apoyo di miembronan importante di NATO, manera Merka, Gran Bretaña, Fransia i Alemania. Na un promé instante su nòmber a haña resistensia di parti di Turkia, otro piesa importante di NATO, pero un biahe pa Istanbul a logra kambia posishon dje pais.

E siman aki, durante di un reunion informal di dirigentenan europeo na Brussels, Rutte tambe a haña e apoyo dje promé minister húngaro, Viktor Orban. E delaster opstákulo ku a keda den su kaminda tabata e kandidatura sorprendente dje rumano Johannis, kende ayera a disidí ku e ta retirá su kandidatura.

Rutte lo ta e di kuater hulandes pa okupá e funshon di Sekretario General di NATO, despues di Dirk Tikker (1957-1963), Joseph Luns (1971-1984) i Jaap de Hoop Schefer (2004-2009).

NATO ta un aliansa polítiko i militar di paisnan di Europa i Nort Amérika. Su miembronan tin e kompromiso di protehá kada otro pais pa kualke menasa.

 

LAGA UN KOMENTARIO

Please enter your comment!
Please enter your name here