RABAT, MOROCCO, AFP.- Míles di manifestante a marcha den kapital di Maroko djadumingu, denunsiando e kosto haltu di bida i represhon, meimei di un inflashon haltu i malkontentu sosial.
“E pueblo ke preis mas abou. Pueblo ke pa eliminá korupshon”, asina e multitut tabata grita. Periodistanan a bisa ku alrededor di 3.000 persona a partisipá den e manifestante, ku ta esun di mas grandi di su sorto den e último lunanan.
“Nos ta protestando kontra un gobièrnu ku ta representá e union di plaka i poder”, asina un di e organisadónan di e manifestashon a bisa.
E manifestantenan a yega for di vários parti di Maroko pa partisipá den e protesta, ku a keda organisá pa pone énfasis riba kasonan di vários “blogger” i periodistanan enkarselá.
Gòlpiá pa e impakto ekonómiko di e pandemia di covid-19 i inflashon, e nivel di pobresa a yega e nivel di aña 2014 bèk, segun indikashon di e Komishon di Planifikashon di gobièrnu den un informe resien.
Inflashon tabata 7,1% interanual den òktober, debí na e oumento di preis di kuminda, provoká pa un sekura intenso ku a afektá agrikultornan.
