‘Ku trabou duru’
WILLEMSTAD.- E direktiva aktual di Partido Nashonal di Pueblo (PNP) eligí dia 6 di òktober último, lo sinta pa 2 aña. Pues su término lo kaba nèt promé ku elekshon na 2029. Na e momentonan ei tur kos mester ta kla, inkluso e fondonan nesesario, pa hiba un kampaña pa elekshon. Asina presidente di PNP. Ornelio ‘Kid’ Martina ta duna di konosé.
Den e podcast 3’or ku Gino e ta trese dilanti ku tantu e rekoudashonnan di fondo mester a tuma lugá, pa asina por finansiá kampaña, komo e lista pa partisipá na elekshon 2029 mester a kuminsá haña forma. Pa Martina un kos ta pará dilanti, i esei ta ku riba e lista di kandidato mester tin mas hóben.
Hóbennan prospekto ku ta presentá ku nan ideanan. E idea ta ku un kombinashon di kandidatonan mas eksperensia ku esnan mas hóben mester bira e éksito na 2029. Manera Martina ta premirá, PNP lo drenta gobernashon despues di e próksimo elekshon.
“Esei mi por bisa bo for di aworakí. Sea na 2029 òf si tin un elekshon promé.” Martina ta di opinion ku e aktual direktiva ta un grupo di persona serio ku por traha duru pa logra esaki, saliendo for di e situashon aktual ku PNP ta e di dos partido mas grandi den Parlamento. Den kaso ku e aktual gobièrnu pèrdè su mayoria den Parlamento i aserká PNP pa forma un mayoria nobo, Martina ta bisa ku lo hiba deliberashon interno pa skucha pensamentu di miembro.
“Lo skucha e konseho di ‘partijraad’ (konseho di partido) i al final direktiva lo tuma un desishon. Personalmente Martina ta dispuesto pa aki 2 aña postulá su mes pa un periodo mas komo presidente. Esaki spesífikamente pasobra ta den porta di un elekshon i asina ta traspasá e periodo aki ku un konsistensia den direktiva.
Despues di elekshon, e ta haña, lo ta un bon momento pa evaluá e trabou ku e direktiva a hasi. “Pero, al final ta miembronan ta disidí. Si nan ta haña ta mihó pone un otro persona pa guia e partido pa bai elekshon, esei tambe lo ta bon.”
Statutonan
Otro aspekto ku e direktiva aktual mester traha riba dje ta kambio di statutonan. Martina ta bisa ku tin un konsepto riba mesa. Direktiva lo pasa den esaki pa wak un mester revisá un ke otro, promé presentá esaki na miembronan.
E kambio di statuto ta pa trese mas efektividat den e manera kon ta hiba maneho di e partido. Por ehèmpel kon ta atendé ku reunionnan ora ku no tin quorum. Por hasi esaki mas efektivo kaminda por ehèmpel por yama e reunion 30 minüt despues, na lugá di mester warda 2 siman, loke ta tarda prosesonan.
E reunion general ta keda e órgano mas haltu di partido i tin e derecho di skohe un direktiva kada 2 aña. Tambe e reunion general ta disidí riba lider nobo, manera ta bai tuma lugá dia promé di novèmber awor. Direktiva t’ei pa tuma desishon riba asuntunan diario.
Den esaki e atenshon pa tantu grandinan komo hóbennan mester t’ei. Den e kuadro aki Martina ta bisa ku tin un ala hubenil kaba i tambe tin un ala pa grandinan, meskos ku tin un ala pa damanan (Damanan di Djárason). Ta asuntu di aktivá esakinan i asina envolví tur hende atrobe aktivamente ku partido.
Mas aleu Martina ta bisa ku lo sòru tambe pa aktividatnan regular na sede di partido. Djárason ta un dia konosí kaba ku sede ta habrí pa miembronan i públiko en general kaminda por pasa, kòmbersá i interkambiá di idea.




Laga un komentario