WILLEMSTAD.- Mas ku 100 persona a partisipá siman pasá na e promé Club17 Climate Fresk Week na Kòrsou. Empresanan, hóbennan i representantenan di media a siña, pa medio di workshopnan interaktivo, kon e kousa i konsekuensianan di kambio di klima ta konektá ku otro. E siman tambe a resultá den un grupo di fasilitadó nobo di Climate Fresk, ku a risibí nan entrenamentu lokalmente. Awor nan mes por duna e workshopnan na Kòrsou.
Stichting Club17 Curaçao, huntu ku su partner KLM Royal Dutch Airlines, a trese Climate Fresk Kòrsou. E workshop ta basá riba rapòrtnan sientífiko di Intergovernmental Panel on Climate Change (IPCC). Partisipantenan ta siña kon e kousanan i konsekuensianan di kambio di klima ta relashoná ku otro. Mundialmente, mas ku 2,3 mion persona den 170 pais a partisipá kaba na Climate Fresk.
Di partisipante pa fasilitadó
Despues di e workshop, 23 partisipante a disidí di bai un stap mas aleu i sigui e entrenamentu pa bira fasilitadó di Climate Fresk. Entre nan tabatin tambe studiantenan di Council of 17 di Club17 Curaçao. Kòrsou tin awor fasilitadónan entrená lokalmente ku por duna Climate Fresk den organisashonnan i skolnan.
Rachel Cronmiller, Marketing and Sales Manager na LionsDive Beach Resort, a sigui tantu e workshop komo e entrenamentu pa fasilitadó. “E konosementu mas importante pa mi tabata ku semper tin mas ku bo por hasi, asta si bo ta okupá kaba konsientemente ku sostenibilidat. Awor nos ke kuminsá duna e workshopnan den LionsDive i tambe kompartí e konosementu aki ku nos partnernan,” Cronmiller a bisa.
Medionan di komunikashon di Kòrsou tambe a partisipá na un workshop spesial di Climate Fresk pa prensa. Nan a siña mas tokante kambio di klima i e papel ku media por hunga den e tema aki.
Gilliard Doran, produktor na TeleCuraçao, a bisa: “Pa mi tabatin kosnan den e workshop ku realmente a habri mi wowonan. Media por yuda pa trese e konosementu aki serka hende den pida chikí i komprendibel. Asina nos por mustra kiko kada persona mes por hasi.”
Di konosementu pa akshon
Climate Fresk Week a sera dia 15 di sèptèmber ku un Club17 Curaçao Partner Meeting na University of Curaçao. Durante e Climate Dialogue, dos studiante di Council of 17 a dialogá ku representantenan di gobièrnu i media lokal. Bou di guia di fasilitadó di Climate Fresk Aisha Al-Balushi, nan a papia tokante riesgonan di klima pa Kòrsou, responsabilidat di kada persona i kiko hende por hasi individualmente i huntu ku otro. E públiko tambe a hasi pregunta.
Dee-Seany di Council of 17 a partisipá na e workshopnan i a risibí entrenamentu pa bira fasilitadó di Climate Fresk. Durante Climate Dialogue, el a bisa:
“Durante e workshop mi a mira kuantu konsekuensia di kambio di klima ta kuminsá ku loke nos komo hende ta hasi i kon tur kos ta konektá ku otro. Na promé instante esaki a hasi mi preokupá. Pero Climate Fresk tambe a mustra mi ku konosementu por hasi hende mas konsiente i stimulá nan pa tuma akshon. Esaki ta duna mi speransa pa futuro di Kòrsou.”
Lara Melkert, koordinadó di Stichting Club17 Curaçao, a bisa: “E siman aki a trese mas ku 100 persona huntu rondó di e mesun tema. E siguiente stap ta pa transformá e konosementu i e konekshonnan nobo aki den akshon. Esaki ta loke Club17 ta representá.”
Durante e reunion, Club17 tambe a duna bon biní na tres partner nobo: Grant Thornton, POSitive Solutions i Stichting Monumentenfonds Curaçao. Nan a firma e Club17 Letter of Intent. Club17 Curaçao awor ta konsistí di 39 partner di diferente sektor, ku ta kolaborá pa futuro di Kòrsou.
Stichting Club17 Curaçao ta un plataforma independiente pa kolaborashon sostenibel na Kòrsou. Club17 ta uni empresanan, gobièrnu, enseñansa, organisashonnan no gubernamental (NGO) i hóbennan. E Sustainable Development Goals (SDG) ta sirbi komo brúgula komun pa nan trabou. Club17 ta konektá organisashonnan ku otro, kompartí konosementu i yuda pa desaroyá i sigui impulsá inisiativanan konhunto.
Riba e potrètnan por mira entre otro firmamentu ofisial ku partnernan nobo di Club17 Grant Thornton, Positive Solutions i Stichting Monumentenfonds Curaçao
Tambe por mira e públiko presente i presentashonnan
