LAMEZIA, ITALIA (AFP).- Mas di 200 persona a keda kondená na Italia ku kastigunan te ku 30 aña di prizòn na final di un kaso penal enorme, asina yamá “huisio makro“, kontra ‘Ndrangheta, e mafia mas poderoso dje pais.

Di e 338 akusadonan ku a komparesé dilanti tribunal di Lamezia Terma, 207 a keda deklará kulpabel i kondená i 131 apsolvé.

Ministerio Públiko  a solisitá un total di kasi 5.000 aña di prizòn kontra dje akusadonan i nan kómplisenan di kòl ku dashi, funshonarionan públiko, polis i inkluso polis di rango haltu.

E sentensianan, lesá pa e hues Brigita Cavasin, ta varia entre algun luna di prizòn i 30 aña, un kastigu ku kuater persona a risibí. Un  dje akusadonan mas konosí, e èks-senador Giancarlo Pittelli, di 70 aña, a keda kondená na 11 aña di prizòn. Fiskal a demandá 17 aña p’e.

‘Ndrangheta, ku tabatin su sede den e region pober di Calabria, ta e mafia italiano mas importante i poderoso.

E ta presente den alrededor di kuarenta pais i tin un kontrol enorme den su region, infiltrando i korumpiendo gobièrnunan.

For di yanüari di 2021, tres hues a bin ta skucha durante di míles di ora e testigunan, inkluyendo komo sinkuenta mafioso ku a arepentí i a bira kolaborador di hustisia. Nan por a deklará tokante e aktividatnan di famia Mancuso i su sosionan.

E “kaso makro” a keda selebrá den un bùnker bou di medidanan hopi estrikto di seguridat den e lokalidat di Lamezia Terme i ta esun di mas importante  kontra di mafia den último 30 añanan.

E promé kaso makro dje tipo aki a tuma lugá den  1986 kontra di miembronan di Palermo, i a finalisá ku kondena di 338 mafioso.

Ekspertonan ta kalkulá ku ‘Ndrangheta, formá pa komo 150 famia, ta konta ku alrededor di 50.000 mion euro na nivel mundial.

LAGA UN KOMENTARIO

Please enter your comment!
Please enter your name here