Gustavo Petro, presidente di Colombia.
BOGOTA, Colombia (AFP).- Outoridatnan di Colombia a informá e kaptura di mas ku 200 miembro dje “Clan del Golfo”, e banda narkotrafikante mas grandi dje pais i responsabel di un “plan pistola” den kua mas ku binti polis a muri.
Na fin di aprel e presidente Gustavo Petro a denunsiá ku e poderoso kartel a imponé un strategia di “asesinato sistemátiko” di miembronan di kuerpo polisial, meimei dje violensia di mas pió den e último dékada.
Den un reakshon koordiná di outoridatnan, a produsí kaptura di 217 individuo di e grupo armá, for di15 di aprel, segun almirante Francisco Cubides, komandante di Forsanan Militar.
Otro 15 narko a pèrdè nan bida den operashonnan di seguridat i a konfiská 6.8 tòn di droga,123 arma di kandela i mas ku 15.000 munishon, segun Cubides.
E akshonnan kontra di Clan del Golfo, di orígen paramilitar, a kosta bida di 16 polis i sinku militar.
“Esei ta e reakshon desesperá di e gruponan armá, ora ku nan risibí gòlpi di parti di forsanan militar i polis” den e departamentonan di Bolivar, Antioquia, Córdoba, Chocó i Magdalena, den nort i wèst di e pais, según Cubides.
Konsiderá komo e grupo di trafikashon di droga mas grandi dje pais i e mayor produktor di kokaina di mundu, Clan del Golfo ta yama su mes “Ejército Gaitanista de Colombia “ i ta konta ku mas di 7.500 miembro.
Colombia ta pasando den e ola di violensia di mas pió for di despues ku a firma e akuerdo di pas den 2016 ku e gueria FARC, meimei di negosiashonnan frustrá entre gobièrnu i e organisashonnan ilegal mas poderoso.
