POLTAVA, UKRANIA (AFP).- Otro bombardeo ruso, e biaha’ki riba e siudat Poltava, a laga mas di 51 morto i alrededor di 200 hende heridá. E presidente ukraniano, Volodimir Zelenski, a primintí ku Rusia lo paga pa e atake, miéntras ku ekiponan di reskate tabata traha pa kita ruinanan pa por saka sobrebibiente.
“Segun e informashon disponibel, e atake ruso a mata 51 persona”, segun Zelenski a bisa. “E kantidat di herido ta 271. Nos sa ku tin mas hende bou dje murayanan dje edifisio destruí. Ta hasiendo tur loke ta posibel pa salba mas tantu bida posibel”.
Segun e gobernador regional, Filip Pronin, “por tin hopi hende mas bou dje murayanan ku a basha den otro”.
Zelenski a bisa ku dos misil a gòlpia “un sentro di enseñansa i un hospital”. Segun e ministerio ukraniano di Defensa, e misilnan a yega hopi lihé despues dje alerta. “A sorprendé e hendenan na momento ku nan tabata dirigiendo nan mes pa e refugio supteraneo”, el a splika.
E atake a tuma lugá den e siudat Poltava ku tabatin den kareda di 300.000 habitante promé ku e invashon ruso di Ukrania den febrüari di 2022.
