…Simpatisantenan dje defuntu lider opositor ruso Alexei Navalny, na Berlin dilanti di embahada ruso, a rekordá e promé aniversario di su morto…
MOSKU, Rusia (AFP).- Mas di mil persona a reuní ayera na Mosku dilanti e graf di Alexei Navalni, apesar dje riesgo di represaya di parti di outoridatnan, riba dia ku a kumpli e promé aniversario di morto den prizòn dje prinsipal opositor di Kremlin.
Por lo ménos 1.500 persona a akudí na e santana di Borísovskoye, den Moskú, kaminda ku Navalni ta derá. Den oranan di mainta a forma fila largu, segun periodistanan.
Den un diskurso kòrtiku e mama dje lider opositor a bisa ku ta su deseo pa esnan responsabel pa e “asesinato” keda kastigá.
“Hinter mundu sa ken a duna e òrdu. Pero nos ke sa ken a kumpli ku e òrdu, ken a permití pa e tuma lugá”, segun Lyudmila Navalnaya, bringando kontra su lágrimanan.
Riba un dia friu, desena di famia ku muchanan a reuní na e sitio ku a konta ku hopi polis na sivil.
Anna, un sikólogo infantil di 63 aña, yorando a bisa di no a spera ku “asina tantu hende” lo a presentá, teniendo kuenta ku “miedu ta presente den tur kas”.
Vários diplomátiko oksidental, entre nan di Merka, Reino Uní, Spaña, Noruega i Union Europeo, tambe tabata presente na e homenahe.
Ku pèrdida dje figura aki, e luchanan interno kontra dje represhon na Rusia a laga oposishon den un posishon debil, ounke ku diferente dirigente eksiliá ta purba na duna bida bèk na e lucha kontra di presidente Vladimir Putin.
Navalni, abogado, aktivista anti korupshon i prinsipal opositor di último tempu, a keda deklará pa hustisia ruso komo “un ekstremista”.
Menshoná su nòmber òf nòmber di su organisashon, e Fondo di Lucha kontra Korupshon (FBK), sin bisa aserka ku ta un organisashon “ekstremista” ta keda kastigá di forma severo.
Su biuda, Yulia Navalnaya, ku a bai para na kabes di su movementu, a tuma parti na un konmemorashon na Berlin, kaminda hopi di su partidarionan ta biba.
Navalnaya, deklará komo “ekstremista” pa outoridatnan ruso, a yama rusonan bibá pafó dje pais pa nan subi kaya i protestá den nòmber di esnan ku no por hasi esei na Rusia.
