…E alkalde demokrat di New York Eric Adams, protehá pa e presidente republikano Donald Trump kende a duna instrukshon pa anulá tur akusashon ku tin kontra di su persona…
NEW YORK, USA (AFP).- Ministerio Públiko di Manhattan, New York, a keda sakudí pa otro renunsia di un fiskal importante kende ta kontra dje òrdu di gobièrnu dje republikano Donald Trump, pa retirá e akusashon di korupshon kontra alkalde dje siudat.
Departamento di Hustisia djaluna a ordená e fiskalnan pa retirá e akusashon kontra e alkalde demokrat Eric Adams, loke a sòru pa un krísis den e institushon hudisial.
Den un e-mail kompartí pa medionan norteamerikano, e fiskal general athunto Hagen Scotten a bisa di ta “totalmente di akuerdo” ku e desishon dje fiskal Danielle R. Sasson, kende a renunsiá pa motibu di no ta di akuerdo pa kumpli ku e instrukshon.
Den su desishon, Departamento di Hustisia a argumentá ku e akusashonnan kontra di Adams “ta restringí di forma no korekto su kapasidat di dediká tur su atenshon i rekursonan na kombatí e inmigrashon ilegal i krímen”.
Adams djaweps pa di dos biaha a risibí e funshonario di gobièrnu di Trump enkargá ku frontera, Tom Homan, responsabel pa e programa di ekspulshon masivo di migrantenan iregular.
New York, un bastion demokrat i progresista, tin un status di “siudat santuario” votá pa legisladornan lokal, ku tin un koperashon limitá ku e agentenan federal enkargá pa kombatí inmigrashon ilegal. Pero e alkalde a primintí na traha mas serka ku e gobièrnu di Trump.
Segun e korant The New York Times, otro sinku funshonario dje divishon anti korupshon di Departamento di Hustisia na Washington tambe a retirá pa evitá di mester kumpli ku instrukshon dje outoridatnan federal nobo.
